Հայ-թուրքական հարաբերությունների կարգավորման գործընթացի մեջ իր խոսքը պետք է ունենա աշխարհասփյուռ հայությունը։ Այս մասին ասվում է ՀՅԴ Շվեդիայի կոմիտեության տարածած հայտարարությունում։
«Ականատես ենք ՀՀ կառավարության ներքին և արտաքին պետականակործան քաղաքականությանը և դրանից բխող Արցախի Հանրապետության ինքնիշխանության ու ապագային սպառնացող վտանգներին ու մարտահրավերներին»,- նշվում է հայտարարույթունում:
ՀՅԴ-ն համոզված է, որ նկատի ունենալով Հայաստանի Հանրապետության իշխող ուժի ընթացքը, ցավոք համոզված ենք որ Հայաստան-Թուրքիա սկսող այս բանակցությունները պիտի հանգեն հետևյալին՝
1. ՀՀ իշխանությունների կողմից հայոց ցեղասպանության միջազգային ճանաչման գործընթացի հրաժարման:
2. Արցախի Ադրբեջանին հանձնումին:
3. Հայաստան-Թուրքիա առկա միջպետական փաստացի սահմանի իրավական ամրագրման:
4. Պանթուրանական ծրագրի մաս կազմող, այսպես կոչված «Զանգեզուրի միջանցք»-ի իրագործման:
ՀՅԴ-ն պահանջում է ՀՀ իշխանություններից անհապաղ երևան հանել Հայաստան-Թուրքիա հարաբերությունների կարգավորման գործընթացի ուղենիշները, կարմիր գծերը և իրողապես չենթարկվել թուրքական նախապայմաններին:
«Հայաստան-Թուրքիա հարաբերությունների կարգավորումը Հայաստանի Հանրապետության իշխանության մենաշնորհը չէ. այդ գործընթացի մեջ իր խոսքը պետք է ունենա աշխարհասփյուռ հայությունը»,- ասվում է փաստաթղթում։
Հայ-թուրքական հարաբերությունների նոր մեկնարկ
Հունվարի 14-ին Մոսկվայում տեղի է ունեցել Հայաստանի և Թուրքիայի միջև հարաբերությունների կարգավորման հարցերով հատուկ ներկայացուցիչների՝ ՀՀ Ազգային ժողովի փոխխոսնակ Ռուբեն Ռուբինյանի և թուրք դիվանագետ, ԱՄՆ-ում նախկին դեսպան Սերդար Քըլըչի հանդիպումը։
Հայաստանի ԱԳՆ-ից հայտնել են, որ հանդիպումն անցել է դրական և կառուցողական մթնոլորտում, հատուկ ներկայացուցիչները նախնական մտքեր են փոխանակել Հայաստանի և Թուրքիայի միջև երկխոսության միջոցով կարգավորման գործընթացի շուրջ։ Կողմերը պայմանավորվել են շարունակել բանակցություններն առանց նախապայմանների, երկրորդ հանդիպման օրն ու վայրը կորոշվեն դիվանագիտական ուղիներով։
ՌԴ ԱԳ նախարար Սերգեյ Լավրովը հայտարարել է, որ Մոսկվան ողջունում է կողմերի առաջին հանդիպումը Ռուսաստանի մայրաքաղաքում։ Նրա խոսքով՝ Ռուսաստանի դերն այս գործընթացում ուղղակի երկխոսության հաստատմանն աջակցելն է։