Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի որոշման նախագիծը Հայաստանին օգնություն տրամադրելու միջոցառումների վերաբերյալ գրեթե պատրաստ է, սակայն մի շարք դիրքորոշումներ դեռ պետք է վերջնական տեսքի բերվեն։ Այս մասին չորեքշաբթի օրը հայտարարել է ՀԱՊԿ գլխավոր քարտուղար Ստանիսլավ Զասը՝ ՀԱՊԿ Հավաքական անվտանգության խորհրդի նիստի արդյունքներով։
«Այսօր առանձնահատուկ ուշադրութմյամբ քննարկվել է երկու փաստաթուղթ․ մեկը Հայաստանի Հանրապետությանը օգնություն ցուցաբերելու որոշման նախագիծ է, փաստաթուղթը գրեթե պատրաստ է, ստեղծված բարդ իրավիճակում, որը, իհարկե, կապված է Հայաստանի և Ադրբեջանի սահմանին լարվածության հետ Հայաստանին օգնություն ցուցաբերելու համալիր միջոցառումներն ընդհանուր առմամբ համաձայնեցվել և որոշվել են»,- ասել է նա, հաղորդում է ՏԱՍՍ-ը։
Զասի խոսքով՝ փաստաթուղթը ընդհանուր առմամբ ընդունվել է, սակայն որոշակի լրամշակման կարիք ունի։ «Ուստի հանձնարարական է տրվել այս փաստաթուղթը վերջնական տեսքի բերել եւ ստորագրման ներկայացնել պետությունների ղեկավարներին»,- ասել է նա։
Զասը նաև հավելել է, որ ՀԱՊԿ Հավաքական անվտանգության խորհրդի հռչակագիրը նույնպես գրեթե պատրաստ է, սակայն այսօրվա քննարկումների արդյունքներով անհրաժեշտ է եղել մի շարք ճշգրտումներ կատարել այս փաստաթղթում։ «Սա նորմալ գործընթաց է», - նշել է նա։