Հայաստանի ԱԳ նախարար Էդվարդ Նալբանդյանը, սեպտեմբերի 11-ին այցելել է Վայոց Ձորի մարզ, որտեղ հանդիպում է ունեցել մարզի ակտիվի՝ համայնքների ղեկավարների, մարզպետարանի ղեկավար աշխատակիցների, կրթական հաստատությունների տնօրենների, Տնտեսագիտական համալսարանի Եղեգնաձորի մասնաճյուղի դասախոսների եւ ուսանողների հետ։
Պատասխանելով ներկաների հարցերին` Էդվարդ Նալբանդյանը հանգամանալից ներկայացրեց Հայաստանի արտաքին քաղաքականության առաջնահերթությունները։ Արտաքին քաղաքական գերատեսչության ղեկավարը մանրամասնորեն անդրադարձավ Հայաստանի եւ ԵԱՀԿ Մինսկի խմբի համանախագահ երկրների ջանքերին` ղարաբաղյան հիմնախնդրի խաղաղ կարգավորման ուղղությամբ։ Արտգործնախարարը խոսեց Եվրասիական տնտեսական միության հիմնադրման մասին պայմանագրին Հայաստանի միացման գործընթացից։ Նախարար Նալբանդյանը պատմեց հարեւան երկների հետ հարաբերությունների մասին, անդրադարձավ Հայաստան – Եվրոպական միություն համագործակցությանը։
Այնուհետեւ Հայաստանի արտաքին քաղաքական գերատեսչության ղեկավարը` Վայոց Ձորի մարզպետ Էդգար Ղազարյանի, ՀՀ պաշտպանության նախարարության չորրորդ բանակային կորպուսի հրամանատար Անդրանիկ Մակարյանի ուղեկցությամբ այցելեց մարզում գտնվող պաշտպանական դիրքեր, զրուցեց Հայրենիքի սահմանները պաշտպանող զինվորների հետ, ծանոթացավ հերթապահություն իրականացնող զինվորների ծառայության պայմաններին, սահմանագծում տիրող իրավիճակին։
Նախարար Նալբանդյանը զինվորներին մաղթելով բարի ծառայություն եւ հաջողություններ` ասաց. «Կարեւոր է, որ դուք այնպես ծառայեք, որ ձեր ընտանիքներում հպարտանան իրենց զավակներով եւ ուրախանան բանակից ստացվող լուրերով։ Համոզված եղեք, Հայաստանի դիվանագետները ջանք չեն խնայում` խաղաղությունը հարատեւ դարձնելու համար»։