Չորեքշաբթի Հավաքական անվտանգության պայմանագրի կազմակերպության արտաքին գործերի նախարարների խորհրդի, պաշտպանության նախարարների խորհրդի և անվտանգության խորհուրդների քարտուղարների կոմիտեի համատեղ նիստի շրջանակներում կայացել է Հայաստանի և Ռուսաստանի ԱԽ քարտուղարներ Արմեն Գրիգորյանի և Նիկոլայ Պատրուշևի հանդիպումը։
Գրիգորյանն իր ռուս գործընկերոջն է ներկայացրել իրավիճակը, որը ստեղծվել է մայիսին Հայաստանի ինքնիշխան տարածքի Սյունիքի և Գեղարքունիքի մարզեր Ադրբեջանի ներխուժման արդյունքում: Նա ընդգծել է, որ Հայաստանի տարածք ցանկացած ներխուժում անընդունելի է, և հավելել, որ երկիրը պատրաստ է հնարավորինս արագ սկսել հայ-ադրբեջանական սահմանի սահմանագժման և սահմանազատման գործընթացը:
Խոսելով տարածաշրջանում երկարաժամկետ խաղաղության հնարավորության մասին, Գրիգորյանը շեշտել է, որ ՀՀ կառավարությունը հայտարարել է «խաղաղության դարաշրջան», որը կայուն խաղաղություն և զարգացում կբերի Հարավային Կովկասի տարածաշրջանին՝ օգտագործելով ենթակառուցվածքների ապաշրջափակման հնարավորությունը:
Պատրուշևը նույնպես ընդգծել է ապաշրջափակման գործընթացի ուղղությամբ աշխատանքը շարունակելու անհրաժեշտությունը՝ շեշտելով, որ դա կնպաստի տարածաշրջանում կայուն խաղաղության հաստատմանը:
Բանակցությունների առանցքային թեմաներից է եղել հայ ռազմագերիների, պատանդների և այլ պահվող անձանց խնդիրը: Գրիգորյանը հույս է հայտնել, որ ռուսական կողմի ջանքերի շնորհիվ հնարավոր կլինի բոլոր գերիների շուտափույթ վերադարձը հայրենիք:
Պատրուշևն, իր հերթին, անդրադարձել է ղարաբաղյան հակամարտության կարգավորմանն ուղղված ջանքերին՝ նշելով այս հարցում գործընթացի ակտիվացման կարևորությունը ԵԱՀԿ Մինսկի խմբի համանախագահության շրջանակներում: