Թուրքիայի նախագահ Ռեջեփ Թայիփ Էրդողանը պաշտոնապես դիմում է ներկայացրել Գերագույն ընտրական խորհուրդ (ԿԸՀ)՝ մայիսի 14-ին կայանալիք ընտրություններում որպես նախագահի թեկնածու գրանցվելու համար։ Ինչպես ուղիղ եթերում ցուցադրել են տեղական հեռուստաալիքները՝ Էրդողանի «Արդարություն և զարգացում» կուսակցության ներկայացուցիչները երեքշաբթի ժամանել են ԿԸՀ՝ նրա գրանցման փաստաթղթերը հանձնելու համար, հայտնում է ՏԱՍՍ-ը։
Թուրքիայի Կենտրոնական ընտրական հանձնաժողովը մարտի 19-ից սկսել է ընդունել նախագահի թեկնածուների դիմումները։ Այս պահին 18 քաղաքական գործիչներ հայտարարել են բարձրագույն պետական պաշտոնի համար պայքարելու ծրագրերի մասին։ Սպասվում է, որ Էրդողանի գլխավոր մրցակիցը կլինի գլխավոր ընդդիմադիր Ժողովրդահանրապետական կուսակցության նախագահ Քեմալ Քըլըչդարօղլուն։
ԱԶԿ-ի հետ միասին Կենտրոնական ընտրական հանձնաժողով են ժամանել նաև իշխող կուսակցության հետ դաշինքի մեջ գտնվող «Ազգայնական շարժում» կուսակցության ներկայացուցիչները։ Նրանք հայտարարել են, որ կուսակցությունները որոշել են Էրդողանին առաջադրել որպես միասնական թեկնածու և ԿԸՀ են ներկայացրել օրենքով պահանջվող բոլոր անհրաժեշտ փաստաթղթերը։
ԿԸՀ-ն ևս երկու ժամ կընդունի թեկնածուների դիմումները։ Երեքշաբթի ավելի ուշ հանձնաժողովի նախագահը կհրապարակի նախագահի հաստատված թեկնածուների վերջնական ցուցակը։
Թուրքիայում մայիսի 14-ին խորհրդարանական ընտրությունների հետ մեկտեղ տեղի կունենան նախագահական ընտրությունները։ Առաջին փուլում հաղթելու համար պետության ղեկավարի թեկնածուն պետք է հավաքի ձայների 50 տոկոսից ավելին։ Հակառակ դեպքում կկայանա երկրորդ փուլ, որին կմասնակցեն առաջինում ամենամեծ աջակցություն ստացած երկու թեկնածուները։ Նախորդ նախագահական ընտրությունները կայացել են 2018 թվականի հունիսի 24-ին։ Էրդողանը հաղթեց՝ հավաքելով ձայների 52,6%-ը։