Հայաստանը Ռուսաստանին և Ադրբեջանին է փոխանցել հայ-ադրբեջանական սահմանին իրավիճակի դեէսկալացիայի վերաբերյալ առաջարկների փաթեթը, չորեքշաբթի խորհրդարանում կառավարության ժամին ասաց Հայաստանի արտգործնախարար Արարատ Միրզոյանը։
Նրան հարցրել են, թե ինչ առաջարկների մասին է խոսել ՌԴ ԱԳ նախարար Սերգեյ Լավրովը, երբ վերջին ասուլիսում անդրադարձել է հայ-ադրբեջանական սահմանի սահմանագծման և սահմանազատման հարցին, և ասել, որ իր հետ զրույցում հայկական կողմը փոխանցել է առաջարկներ, որոնք. ուղարկվել են Բաքու։
«Այո, դուք իրավացի եք, Լավրովը նման հայտարարություն արե էլ, և նրա տեղեկությունները համապատասխանում են իրականությանը։ Այո, հայկական կողմը նախապատրաստել է հայ-ադրբեջանական սահմանին իրավիճակի դեէսկալացիայի և անվտանգության մակարդակը բարձրացնելու միջոցառումների փաթեթ և այն հանձնել է և՛ ռուսական կողմին, և՛ Ռուսաստանի միջնորդությամբ՝ նաև Ադրբեջանին և այլ գործընկերներին»,- ասել է Միրոզյանը։
Նա նշել է, որ դեռ պատասխան չկա, սակայն ձեռնպահ է մնացել մանրամասներ հաղորդելուց՝ ասելով, որ «իմաստ չունի»։
«Կարող եմ միայն ասել, որ դրանք բխում են զորքերի հայելային դուրսբերման և անվտանգության լրացուցիչ մեխանիզմների ստեղծման մեր կողմից նախկինում հրապարակած հայեցակարգից, որը հնչեցվել է կառավարության և վարչապետի կողմից»,- պարզաբանել է նա՝ հավելելով, որ այդ փաթեթը և մոտեցումները ներկայացվել են Անվտանգության խորհրդի նիստում։