Ապրիլյան քննիչ հանձնաժողովի նախագահ Անդրանիկ Քոչարյանն առաջարկում է ևս 6 ամսով երկարաձգել հանձնաժողովի գործունեության ժամկետը։
Քննիչ հանձնաժողովի նիստում ընդունված այդ առաջարկը նա այսօր ներկայացրեց ԱԺ նիստում` մինչ այդ որոշ հաշվետվություն ներկայացնելով նախորդ 6 ամիսներին կատարած աշխատանքների վեաբերյալ։
«Ս.թ. հուլիսի 9-ին ՊՆ–ից ստացվել է փաստաթղթերի առաջին խումբը, և սկսվել են դրանց մանրակրկիտ ուսումնասիրությունները։ Առ այսօր հանձնաժողովն ուսումնասիրել է 2684 էջ ծավալով փաստաթղթեր` 147տեքստային և 14 գրաֆիկական քարտեզներ, տեղեկատվական– վերլուծական և հետախուզական, զորքերի կառավարման, օպերատիվ և այլ բնույթի գաղտնի և հույժ գաղտնի փաստաթղթեր: իսկ հանձնաժողովի գումարած 21 նիստում հարցաքննվել են 10 զինծառայող։
Իսկ լրացուցիչ ժամանակահատվածում հանձնաժողովն, ըստ Քոչարյանի, պատրաստվում է լսել պաշտոնյաների պարզաբանումները։ Նրանց թիվը կարող է հասնել 40-ի։
Իմ քայլը» խմբակցության ղեկավար Լիլիթ Մակունցը հետաքրքրվեց՝ հետագա աշխատանքների համար պահանջվող հստակ ժամանակացույց կա՞:
«Գուցե ավելի կարճ ժամանակահատվածում էլ տեղավորվենք, բայց որակապես բարձր մակարդակի եւ անթերի եզրակացություններ պետք է ներկայացնենք, որպեսզի քաղաքական շահարկումներ չլինեն»:
Պատգամավոր Արման Բաբաջանյանը հայտարարեց,որ քաղաքական շահարկումներ արդեն եղել են, ապագայում էլ կլինեն: Իսկ դիմադրության հանդիպե՞լ եք: Ե՞րբ սպասենք, որ Խաչատուրովը, Բաղմանյանը եւ Սերժ Սարգսյանը հարցաքննվեն ձեր հանձնաժողովում: Դուք հայտարարել եք այդ մասին:
Անդրանիկ Քոչարյանն արձագանքեց,որ դիմադրության չեն հանդիպել, թեեւ գուցե չհասկացված պահեր են եղել: Դրանք հաղթահարված են: Իսկ հրավիրյալները հաստատված են, և նշած անձանց պարտավոր են լսել։
«Հանձնաժողովը պարտավոր է լսել նրանց` ընդհուպ մինչև այդ ժամանակ ՀՀ նախագահի պաշտոնը զբաղեցրած Սերժ Սարգսյանին, որովհետև նա իրականացրել է գլխավոր գերագույն հրամանատարի գործառույթ և հարցեր կան, որոնք այս ամիսների ընթացքում հավաքվել են, ուսումնասիրվում են, և դրանց վերջնական պատասխանները պետք է ստանանք Սերժ Սարգսյանից։ Իսկ նրանից առաջ` բոլոր այն պաշտոնյաներից, որոնք առնչություն են ունեցել այդ իրադարձություններին»,– ասաց Քոչարյանը։
Հանձնաժողովի նախագահը վստահեցրեց, որ մինչև հիմա քաղաքական շահարկումը բացառվել է ու այսուհետ ևս բացառվելու է։
Նշենք,որ Անդրանիկ Քոչարյանի այս հայտարարությանը արձագանքել է ՀՀԿ մամլո խոսնակ Էդուարդ Շարմազանովը։ Նա նշել է,որ որպես ԱԺ 5-րդ գումարման փոխնախագահ եւ ՀՀ ԳՄ անդամ, վերահատատում է, որ Սերժ Սարգսյանը հանրությունից թաքցնելու բան չունի:
«Միեւնույն ժամանակ պնդում եմ, որ հանձնաժողովը պարտավոր է լսել նախկին ԱԺ պատգամավոր, ներկայիս վարչապետ Նիկոլ Փաշինյանին, թե որտեղից նրան տեղեկությունը, որ Ապրիլյան պատերազմը պայմանավորված է եղել, տեղի է ունեցել Ռուսաստանի լուռ համաձայնությամբ եւ որ այս պատերազմի նպատակը Ադրբեջանին ԵԱՏՄ-ին անդամակցությունն էր:Այս հույժ կարեւոր տեղեկության աղբյուրը պետք է բացահայտվի, ինչը կտա մի շար հարցերի պատասխաններ»,–ասել էր Շարմազանովը:
Վերջինս շեշտել է նաև,որ եթե հանձնաժողովի նպատակը ոչ թե շոուներ եւ քաղաքական սերիալներ բեմականացնելն, այլ իրական արդյունավետությունը, ապա Փաշինյանը պետք է պատասխանը վերոնշյալ հարցերին»:
Հիշեցնենք` Ապրիլյան քառօրյա պատերազմի հանգամանքների ուսումնասիրության քննիչ հանձնաժողովը ստեղծվել է ԱԺ–ի` 2019թ.–ի մայիսի 31-ին ընդունած որոշմամբ։
Արմրնե Գևորգյան