Ալեն Սիմոնյանը աբսուրդ է որակել Հայաստան այցելելու դեպքում Պուտինին ձերբակալելու մասին խոսակցությունները:
«Մենք միշտ մեզ պահել ենք դաշնակցի պես, և Ռուսաստանի դեմ հատուկ քայլեր չենք ձեռնարկել, ներողություն եմ խնդրում, բայց Հայաստանը չէ, որ պետք է այս բեռն իր ուսերին վերցնի»,- 1in.am-ի հետ զրույցում ասաց Սիմոնյանը։
Նա անհեթեթ է անվանել հնարավոր ձերբակալության մասին հայտարարությունները և նշել, որ Հայաստանը միշտ անկեղծ է եղել Ռուսաստանի հետ հարաբերություններում։
«Սա թույլ է տալիս մեզ քննադատել ՌԴ որոշ դիրքորոշումներ ու գործողություններ, որոնք անհասկանալի են մեր համար։ Մենք միշտ մեզ ճիշտ դաշնակցի պես ենք պահել և անկեղծ ենք եղել բոլոր գործընկերների հետ։ Կրկնում եմ՝ պետք չէ որևէ քաղաքական ենթատեքստ փնտրել, իսկ քննարկումներ (Հռոմի կանոնադրության վավերացման վերաբերյալ) չեն եղել»,- ասաց նա։
Այս տարվա մարտի 17-ին ՄՔԴ-ն ՌԴ նախագահ Վլադիմիր Պուտինին ձերբակալելու օրդեր է տվել։ Այնուհետեւ իշխող «Քաղաքացիական պայմանագիր» խմբակցության պատգամավոր Գուրգեն Մելքոնյանը հայտարարեց, որ Հռոմի ստատուտի վավերացումից հետո, եթե ՌԴ նախագահը այցելի Հայաստան, իրեն կձերբակալեն։
ՄՔԴ-ի Հռոմի կանոնադրության սահմանադրականության մասին
Մարտի 24-ին ՀՀ Սահմանադրական դատարանը Միջազգային քրեական դատարանի (ՄՔԴ) Հռոմի կանոնադրությամբ Հայաստանի պարտավորությունները ճանաչեց երկրի Հիմնական օրենքին համապատասխան։
Հայաստանի կառավարությունը 2022 թվականի վերջին Հռոմի ստատուտի սահմանադրականությունը ստուգելու հարցով դիմել է Սահմանադրական դատարան։ Երևանը նշել է, որ այս փաստաթղթի վավերացումը թույլ կտա ՄՔԴ-ում վարույթ հարուցել Ադրբեջանի դեմ (Արցախում և Հայաստանում ռազմական հանցագործությունների համար - խմբ.):
Հայաստանը Հռոմի ստատուտը ստորագրել է 1998 թվականի հուլիսի 17-ին, սակայն չի վավերացրել այն, քանի որ 2004 թվականին Սահմանադրական դատարանը ճանաչեց պայմանագրի պարտավորությունները հակասող այն ժամանակ գործող Սահմանադրության մի շարք դրույթների։