Եվրախորհրդարանն ընդունել է ԵՄ-Հայաստան հարաբերությունների վերաբերյալ զեկույցը, որում պատգամավորները համոզմունք են հայտնել, որ Հայաստանի և Ադրբեջանի միջև կայուն խաղաղություն հնարավոր չէ հասնել ռազմական ճանապարհով և ուժի սպառնալիքով, անհրաժեշտ է համապարփակ քաղաքական կարգավորում՝ միջազգային իրավունքին համապատասխան։
Զեկույցում խստորեն դատապարտվում է 2022 թվականի սեպտեմբերին Ադրբեջանի կողմից իրականացված լայնածավալ ռազմական ագրեսիան Հայաստանի ինքնիշխան տարածքի դեմ։
Պատգամավորները կոչ են անում Ադրբեջանի իշխանություններին.
- անհապաղ լքել Հայաստանի տարածքը և ազատ արձակել Ադրբեջանում պահվող ռազմագերիներին
- ապահովել Լաչինի միջանցքով տեղաշարժի ազատությունն ու անվտանգությունը
Միաժամանակ նրանք կոչ են անում Հայաստանին և Ադրբեջանին
- ամբողջությամբ իրականացնել 2020 թվականի նոյեմբերի 9-ի հրադադարի եռակողմ հայտարարությամբ ամրագրված բոլոր պարտավորությունները․
- նպաստել ապագա խաղաղության պայմանագրի քննարկմանը, լուծել հակամարտության բուն պատճառները և զերծ մնալ ցանկացած միջոցներից, որոնք կարող են հանգեցնել հետագա սրման․
- շտապ միջոցներ ձեռնարկել՝ ուղղված իրենց բնակչությանը խաղաղ գոյակցությանը նախապատրաստելուն, ներառյալ մարդկանց միջև շփումների ամրապնդմանն ուղղված միջոցառումները․
- ձեռնպահ մնալ թշնամական հռետորաբանությունից կամ գործողություններից, որոնք կարող են ընկալվել որպես ատելության կամ բացահայտ բռնության դրդում կամ որպես անպատժելիության աջակցություն․
- ստեղծել անցումային արդարադատության մեխանիզմ՝ որպես վստահության ամրապնդման միջոց՝ կայուն խաղաղության և հաշտեցման հասնելու համար:
Ավելի վաղ նմանատիպ կոչերով ու պահանջներով զեկույց էր ընդունվել ԵՄ-Ադրբեջան հարաբերությունների վերաբերյալ։