Հավաքական անվտանգության պայմանագրի կազմակերպության (ՀԱՊԿ) անդամ երկրների ղեկավարները երկուշաբթի օրը կայացած հանդիպման ժամանակ առաջարկներ են ներկայացրել ճգնաժամային արձագանքման համակարգի կատարելագործման վերաբերյալ․ դրանք կմշակվեն։ Այս մասին հայտարարել է ՀԱՊԿ գլխավոր քարտուղար Ստանիսլավ Զասը Մոսկվայում կայացած հոբելյանական գագաթնաժողովի արդյունքներով մամուլի ասուլիսում, փոխանցում է ՏԱՍՍ-ը։
Նրա ուշադրությունը հրավիրվեց ՀՀ վարչապետ Նիկոլ Փաշինյանի այն խոսքերի վրա, որ անհրաժեշտ է բարելավել կազմակերպության ներսում ճգնաժամային արձագանքման մեխանիզմները։ «Այսօր քննարկվել է այդ հարցը, բավականին շատ առաջարկներ են արվել ճգնաժամային արձագանքման համակարգը բարելավելու համար, այդ թվում՝ հայկական կողմից»,- հաստատել է ի պատասխան գլխավոր քարտուղարը։
Զասը մանրամասնել է, որ այլ պետությունների ղեկավարները նույնպես իրենց առաջարկներն են արտահայտել այս հարցի վերաբերյալ, ընդ որում, դա արվել է «հաշվի առնելով Ղազախստանում ձեռք բերված գործնական փորձը»։ Խոսելով այս հանրապետությունում խաղաղապահ ուժերի ներգրավվածության մասին՝ նա նշել է, որ ընդհանուր առմամբ այս համակարգը աշխատել է.
«Հիմա դրված է հետևյալ խնդիրը․ կատարել անհրաժեշտ ճշգրտումներ՝ չխախտելով սկզբունքորեն ստեղծված համակարգը, որն, ըստ էության, աշխատեց և թույլ տվեց մեզ կատարել դրված խնդիրները», - նշել է նա։ - Նման աշխատանքներ կտարվեն»։
ՀԱՊԿ գլխավոր քարտուղարը պարզաբանել է, որ այդ թեման քննարկվել է, այդ թվում՝ Կովկասի պետությունների առնչությամբ։ «Այս հարցը կմշակվի ու կքննարկվի»,- ամփոփել է նա։
Իրավիճակը Ղազախստանում
Այս տարվա հունվարի սկզբին Ղազախստանում զանգվածային անկարգություններ տեղի ունեցան, որոնց մասնակիցները նաև հարձակվում էին ոստիկանների ու զինվորականների վրա։ Այդ ժամանակ հանրապետության նախագահ Կասիմ-Ժոմարտ Տոկաևը հայտարարեց հեղաշրջման փորձի մասին և դիմեց ՀԱՊԿ-ի օգնությանը։ Հունվարի 7-ին իրավիճակը հաջողվեց կայունացել։
Փետրվարի վերջին Տոկաեւի հետ հանդիպմանը Փաշինյանն ընդգծեց, որ ողջունում է ՀԱՊԿ-ի այս մեխանիզմների կիրառումը Ղազախստանի իրադարձությունների հետ կապված։ Միաժամանակ նա նշեց, որ դրանք չաշխատեցին սահմանին հայ-ադրբեջանական բախումների սրման ժամանակ։
ՀԱՊԿ-ի մասին
ՀԱՊԿ-ը անվտանգության հարցերով միջազգային կազմակերպություն է, որին ներկայումս անդամակցում է վեց պետություն՝ Հայաստանը, Բելառուսը, Ղազախստանը, Ղրղզստանը, Ռուսաստանը և Տաջիկստանը։ Կազմակերպության ստեղծման մասին պայմանագիրը 1992 թվականի մայիսի 15-ին Տաշքենդում ստորագրել են Հայաստանի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի (2012 թվականից չի հանդիսանում ՀԱՊԿ անդամ) ղեկավարները։