Ադրբեջանի արտաքին գործերի նախարար Էլմար Մամեդյարովը մայիսի 24-26-ը պաշտոնական այցով կմեկնի Մոսկվա, հայտնում է Ռուսաստանի ԱԳՆ-ից:
Երկուշաբթի Ռուսաստանի և Ադրբեջանի արտաքին քաղաքական գերատեսչությունների ղեկավարները բանակցություններ կունենան։
«Առաջիկա այցը դիտարկում ենք ռուս-ադրբեջանական քաղաքական երկխոսության զարգացման շարունակության համատեքստում... Մայիսի 25-ին բանակցությունների ընթացքում արտաքին քաղաքական գերատեսչությունների ղեկավարները կքննարկեն երկկողմ համագործակցության հեռանկարները, տարածաշրջանային և միջազգային օրակարգի հիմնական ասպեկտները, այդ թվում՝ Լեռնային Ղարաբաղի հակամարտության կարգավորումը»,- ասվում է նախարարության հաղորդագրությունում։
Գերատեսչությունում նշել են, որ Ռուսաստանը, հանդիսանալով ԵԱՀԿ Մինսկի խմբի համանախագահ երկիր, ավելի քան երկու տասնամյակ շարունակում է կարևոր դեր խաղալ ԼՂ հակամարտության կարգավորման գործում։
«Հաշվի առնելով աշխարհագրական մոտ դիրքը և մեր ժողովուրդների ընդհանուր պատմությունը՝ հակամարտության լուծումը մեզ համար առաջնահերթ նշանակություն ունի և ռուսական արտաքին քաղաքականության առաջնահերթություններից է»,- նշել են նախարարությունում։
Ռուսաստանի ԱԳՆ-ում նշել են նաև, որ «Ադրբեջանը Ռուսաստանի համար կարևոր ռազմավարական գործընկեր է Անդրկովկասում և Կասպյան շրջանում»։