Հայաստանի հարկային ծառայությունը պատրաստ է Թուրքիայի հետ սահմանները բացելուն, Սիվիլնեթին տված հարցազրույցում ասել է Պետական եկամուտների կոմիտեի ղեկավար Ռուստամ Բադասյանը։
Նա նշել է, որ Թուրքիայի հետ սահմանները բացվելուց հետո առևտրային և հարկային հարաբերությունների հետ կապված խնդիրներ չեն լինի, քանի որ կան միջազգային կոնվենցիաներ, որոնք կարգավորում են այդ հարցերը։
«Մենք պատրաստ ենք սահմանների բացմանը, անկախ նրանից, թե դա կլինի միայն երրորդ երկրի քաղաքացիների համար, թե ավելի լայն, մենք պատրաստ ենք սպասարկել ամբողջ հոսքը։ այդ պատճառով մենք վերլուծեցինք առկա խնդիրները և հասկացանք, թե ինչ ենթակառուցվածքներ, հարկային գործիքներն ու ռեսուրսներ ենմեզ անհրաժեշտ են»,- ասել է նա։
Նա նաև ասել է, որ բանակցություններ են ընթանում սահմանների բացման ուղղությամբ, սակայն մանրամասներ չի հայտնել՝ նշելով, որ կան տարբեր սցենարներ, որոնց տարբեր ենթակառուցվածքային պահանջներ են համապատասխանում։։
Հայ-թուրքական երկխոսության մասին
Թեև Թուրքիան 1991 թվականի դեկտեմբերի 24-ին պաշտոնապես ճանաչել է Հայաստանի Հանրապետությունը , սակայն մինչ օրս պետությունների միջև դիվանագիտական հարաբերություններ չեն հաստատվել։ 1993 թվականին Թուրքիան միակողմանի փակեց Հայաստանի հետ իր օդային և ցամաքային սահմանները։ Օդային սահմանը բացվել է 1995 թվականին միջազգային հանրության ճնշման ներքո։
Հայաստանի ներկայիս ղեկավար Նիկոլ Փաշինյանը 2020 թվականի աշնանը արցախյան 44-օրյա պատերազմից հետո սկսեց ակտիվորեն քարոզել տարածաշրջանում, այսպես կոչված, «խաղաղության դարաշրջան» ձևավորելու գաղափարը, և այս տրամաբանությամբ արդեն գործնական քայլեր են արվում Թուրքիայի և Ադրբեջանի հետ հարաբերությունները բարելավելու ուղղությամբ։
2021 թվականի դեկտեմբերին Հայաստանն ու Թուրքիան նշանակեցին հայ-թուրքական հարաբերությունների կարգավորման իրենց հատուկ ներկայացուցիչներ՝ ՀՀ Ազգային ժողովի փոխխոսնակ Ռուբեն Ռուբինյանին և փորձառու դիվանագետ, ԱՄՆ-ում Թուրքիայի նախկին դեսպան Սերդար Քըլըչին։
2022 թվականի մարտի 12-ին Անթալիայի դիվանագիտական ֆորումի շրջանակներում տեղի ունեցավ Հայաստանի և Թուրքիայի ԱԳ նախարարներ Արարատ Միրզոյանի և Մևլութ Չավուշօղլուի հանդիպումը, որի ընթացքում քննարկվեց հարաբերությունների կարգավորման հետագա ընթացքը, կողմերը հաստատեցին իրենց պատրաստակամությունը առաջ տանել այս գործընթացը առանց նախապայմանների, որպեսզի այն պսակվի երկու երկրների միջև հարաբերությունների հաստատմամբ և սահմանների բացմամբ։
2022 թվականի հուլիսի 1-ին Հայաստանի և Թուրքիայի հատուկ ներկայացուցիչներ պայմանավորվեցին ապահովել հայ-թուրքական ցամաքային սահմանը հնարավորինս արագ հատելու հնարավորությունը համապատասխանաբար Հայաստան և Թուրքիա այցելող երրորդ երկրների քաղաքացիների համար։ Պայմանավորվածություն է ձեռք բերվել նաև Հայաստանի և Թուրքիայի միջև ուղիղ ավիաբեռնափոխադրումների շուտափույթ մեկնարկի վերաբերյալ։
2023 թվականի սկզբին հայտնի դարձավ, որ Հայաստանի և Թուրքիայի միջև ուղիղ ավիաբեռնափոխադրումների խոչընդոտները լուծվել են, և դրանք հնարավոր դարձան հունվարի 1-ից։
