Թուրքիայի քաղաքացիները Հայաստանում միշտ էլ գնել են անշարժ գույք և ընկերություններ։ Այս մասին հինգշաբթի ՀՀ կառավարության նիստից հետո հայտարարեց էկոնոմիկայի նախարար Վահան Քերոբյանը։
Նա այսպես մեկնաբանեց տեղեկությունները, թե վերջին ժամանակներս թուրքերը Հայաստանում անշարժ գույքի սեփականատեր են դառնում։
«Միշտ էլ այդպես է եղել, օրինակ՝ գնել են անշարժ գույք, ընկերություններ»,- նշեց Քերոբյանը։
Նա չպատասխանեց հարցին, թե որ ընկերությունների և որքան ներդրված միջոցների մասին է խոսքը՝ չցանկանալով բարձրաձայնել այդ թիվը։ Հայաստանում Թուրքիայի քաղաքացիների ձեռք բերված գույքի մասին ավելի մանրամասն տեղեկություններ ստանալու համար նախարարն առաջարկեց լրագրողներին դիմել Կադաստրի կոմիտե, Պետռեգիստր և Կենտրոնական դեպոզիտարիա։
Քերոբյանը բացասական պատասխան տվեց նաև այն հարցին, թե արդյոք Հայաստանում ռազմավարություն է մշակվում Թուրքիայի հետ հարաբերությունների կարգավորման համատեքստում երկրի ռազմավարական շահերը պաշտպանելու համար։
Հայ-թուրքական առաջին հանդիպման մասին
Հունվարի 14-ին Մոսկվայում տեղի ունեցավ Հայաստանի և Թուրքիայի միջև հարաբերությունների կարգավորման հարցերով հատուկ ներկայացուցիչների՝ ՀՀ ԱԺ փոխխոսնակ Ռուբեն Ռուբինյանի և դեսպան Սերդար Քըլըչի հանդիպումը։
Հայաստանի արտգործնախարարությունը հայտարարեց, որ հանդիպումն անցել է դրական և կառուցողական մթնոլորտում, հատուկ ներկայացուցիչները նախնական մտքեր են փոխանակել Հայաստանի և Թուրքիայի միջև երկխոսության միջոցով կարգավորման գործընթացի շուրջ։ Կողմերը պայմանավորվել են շարունակել բանակցություններն առանց նախապայմանների, երկրորդ հանդիպման օրն ու վայրը կորոշվի պատշաճ ժամանակ դիվանագիտական ուղիներով։
ՌԴ դիվանագիտական գերատեսչության ղեկավար Սերգեյ Լավրովը հայտարարեց, որ Մոսկվան ողջունում է կողմերի առաջին հանդիպումը Ռուսաստանի մայրաքաղաքում և աջակցություն խոստացավ ուղիղ երկխոսության հաստատման հարցում։
Հայաստանի և Թուրքիայի միջև հարաբերությունների բացակայության մասին
1991-ի դեկտեմբերի 24-ին Թուրքիան պաշտոնապես ճանաչել է Հայաստանի Հանրապետությունը, բայց մինչ օրս հրաժարվում է Հայաստանի հետ դիվանագիտական հարաբերություններ հաստատել:
1993-ին Թուրքիան միակողմանիորեն փակեց իր օդային և ցամաքային սահմանները Հայաստանի հետ: Օդային սահմանը բացվել էր 1995-ին` միջազգային հանրության ճնշման ներքո: Ցամաքային սահմանի բացման և դիվանագիտական հարաբերությունների հաստատման համար Թուրքիան առաջ էր քաշում մի շարք անընդունելի պայմաններ, մասնավորապես` հրաժարվել Հայոց ցեղասպանության միջազգային ճանաչումից:
1991 թվականից ի վեր արվել են երկկողմ հարաբերությունների կարգավորման մի շարք փորձեր, որոնք արդյունք չեն տվել Թուրքիայի դիրքորոշման պատճառով:
Հարաբերությունների կարգավորման գործընթացը 2008-ի աշնանը նախաձեռնել էր Հայաստանի այն ժամանակվա նախագահ Սերժ Սարգսյանը: 2009 թ. հոկտեմբերի 10-ին Ցյուրիխում Հայաստանի և Թուրքիայի արտգործնախարարները ստորագրեցին «Հայաստանի Հանրապետության և Թուրքիայի Հանրապետության միջև դիվանագիտական հարաբերություններ հաստատելու մասին» «Հայաստանի Հանրապետության և Թուրքիայի Հանրապետության միջև հարաբերությունների զարգացման մասին» արձանագրությունները, որոնք պետք է վավերացվեին երկու երկրների խորհրդարանների կողմից: Սակայն 2010 թվականի ապրիլի 22-ին Սարգսյանն իր հրամանագրով կասեցրեց հայ-թուրքական արձանագրությունների վավերացման գործընթացը` հայտարարելով, որ Թուրքիան պատրաստ չէ շարունակել այն։