Հոկտեմբերի 23-ին ԵԱՀԿ կարիքների գնահատման խմբի ներկայացուցիչներն այցելել են ՀՀ Սյունիքի մարզի սահմանամերձ բնակավայր՝ տեղում ծանոթանալու իրավիճակին, հայտնում են մարզպետարանից։
Մարզպետարանի աշխատակիցները պատվիրակությանը ներկայացրել են սեպտեմբերի 13-ին Ադրբեջանի զինված ուժերի՝ Հայաստանի Հանրապետության ինքնիշխան տարածքի հանդեպ իրականացրած վերջին ագրեսիայի հետևանքները։
ԵԱՀԿ առաքելության մասին
ԵԱՀԿ-ն հոկտեմբերի 21-27-ը Հայաստան կուղարկի կարիքների գնահատման խումբ՝ անվտանգության համակարգային հայեցակարգի շրջանակներում ԵԱՀԿ փորձի և մանդատի հիման վրա հայ-ադրբեջանական սահմանի որոշ շրջաններում իրավիճակը գնահատելու նպատակով։
ԵԱՀԿ քարտուղարության ներկայացուցիչներից և միջազգային փորձագետներից բաղկացած տեխնիկական խումբը կայցելի հայ-ադրբեջանական սահմանին գտնվող շրջաններ և խորհրդակցություններ կանցկացնի տեղական և ազգային համապատասխան շահագրգիռ կողմերի հետ, ինչպես նաև՝ միջազգային գործընկերների հետ:
Հայաստանի դեմ Ադրբեջանի ագրեսիայի մասին
Սեպտեմբերի 13-14-ը ադրբեջանական զինուժը լայնածավալ ագրեսիա է ձեռնարկել Հայաստանի ինքնիշխան տարածքի դեմ՝ կիրառելով խոշոր տրամաչափի զենքեր, հրետանի, հրթիռային համակարգեր և անօդաչու սարքեր։
Ադրբեջանական զինուժը հրետակոծել է Հայաստանի 36 բնակավայր, այդ թվում՝ Գորիս, Սիսիան, Կապան, Ջերմուկ, Վարդենիս, Տեղ, Գեղամասար համայնքները, ինչի հետևանքով ամբողջությամբ կամ մասնակի այրվել է ավելի քան 190 բնակելի տուն, էներգետիկ ենթակառուցվածքներ, ջրամատակարարման օբյեկտներ, գազատարներ, կամուրջ և ավտոճանապարհներ։
Վերջին տվյալներով՝ հայկական կողմից զոհվել կամ անհետ կորել է 207 մարդ, այդ թվում՝ զոհվել է 4 խաղաղ բնակիչ, 2 խաղաղ բնակչի գտնվելու վայրը հայտնի չէ։ 293 զինծառայող և 8 խաղաղ բնակիչ վիրավորվել է, շուրջ 20 զինծառայող գերի ընկել։ Ապացույցներ կան ադրբեջանցիների կողմից գերի ընկած կամ վիրավորված հայ զինվորների խոշտանգումների, անդամահատման, և, այսպիսով՝ անօրինական սպանությունների դեպքերի մասին։