Արդարադատության նորանշանակ նախարար Հովհաննես Մանուկյանը այսօր Կառավարության նիստից հետո լրագրողների հետ զրույցում նշել է, որ իր կողմից ղեկավարվող ոլորտում կան բազմաթիվ հիմնախնդիրներ, բայց ամենակարևորը՝ հասարակության վստահության մակարդակի բարձրացումն է:
«Եթե անելիքները քիչ լինեին, կկարողանայի հիմա դրանք թվել, բայց իսկապես անելիքները շատ են, և դա կապ չունի ժառանգության հետ: Արդարադատությունը ծանրագույն ոլորտներից մեկն է, և շատ գործ կա անելու: Այսօր շատերը Արդարադատության նախարարությունը և դատական համակարգը շփոթում են: Ես քիչ առաջ, որ մտնում էի կառավարության նիստին, կանգնած էին մարդիկ, որոնք հետևյալ արտահայտությունն արեցին՝ «հիմա կտեսնենք արդարադատության նախարարը արդար կդատի՞, թե՝ չէ»: Նախարարը չի դատում, նա լրիվ այլ գործառույթներ ունի»,- ասաց նախարարը:
Հովհաննես Մանուկյանը լրագրողներին տեղեկացրել է, որ նախարարությունում իրականացվելու են կադրային փոփոխություններ, քանի որ լուրջ փոփոխությունը գրագետ կադրային քաղաքականությունն է:
Հարցին, թե կառավարության նիստին վարչապետ Հովիկ Աբրահամյանը դիմելով նախարարներին ասաց, որ Կառավարության այն անդամները, ովքեր չեն կատարի իրենց ծրագիրը, ճանապարհները կբաժանվեն, ում նկատի ուներ և ինչու սպառնաց, պատասխանեց. «Վարչապետը չսպառնաց, կարծում եմ, շատ ճիշտ արտահայտություն է արել, որ իրեն հարգող նախարարը կամ քաղաքական գործիչը, եթե զգա, որ չի կարողանում իր առջև դրած խնդիրը լուծել, ինքը պետք է հրաժարական տա ու չսպասի վարչապետին»,- ասաց նա:
Անդրադառնալով Կառավարության կողմից մշակվող նոր ծրագրին, նշեց. «Կառավարության նախորդ ծրագիրը չեմ գնահատի, բայց նախորդը շատ ավելի ընդհանուր ձևակերպումներով էր: Դեկլարատիվ մասը մի քիչ ավելի շատ էր»: