Հայաստանի փոխարտգործնախարար Պարույր Հովհաննիսյանը հայտարարեց, որ Իրանը խնդիր չի տեսնում Հայաստանում ԵՄ առաքելությունը Ադրբեջանի հետ սահմանին տեղակայելու հարցում։
«Հարևան Իրանը (Ռուսաստանից - խմբ.) ոչ պակաս զգայուն է արձագանքում տարածաշրջանում տեղի ունեցող գործընթացներին: Սակայն Իրանը նույնպես դրական գնահատական է տվել, դեմ չէ ԵՄ-ից դիտորդների տեղակայմանը։ Ոչ վաղ անցյալում Հայաստանում Իրանի դեսպանը հստակ հայտարարեց. Թեհրանն այս հարցում խնդիրներ չի տեսնում»,- ասաց փոխնախարարը ՀՀ ԱԺ եվրոպական ինտեգրման հարցերի մշտական հանձնաժողովի նիստում։
Ավելի վաղ Հայաստանում Իրանի դեսպան Աբբաս Բադախշան Զոհուրին ասել էր, որ Իրանը դեմ չէ Հայաստանի և Ադրբեջանի սահմանին ԵՄ քաղաքացիական առաքելության տեղակայմանը։ «Մյուս երկրները նույնպես կարող են նպաստել տարածաշրջանում անվտանգության և խաղաղության ապահովմանն», - ասել էր դեսպանը (մեջբերումը՝ «Արմենպրես»-ից):
ԵՄ առաքելության մասին
Հայաստանում ԵՄ քաղաքացիական առաքելությունը (EUMA) մեկնարկել է այս տարվա փետրվարի 20-ին Անվտանգության և պաշտպանության ընդհանուր քաղաքականության (CSDP) շրջանակներում և ունի երկամյա մանդատ։ EUMA-ի բացառապես քաղաքացիական անձնակազմի ընդհանուր թիվը մոտ 100 մարդ է, այդ թվում՝ շուրջ 50 անզեն դիտորդ։
ԵՄ առաքելության օպերատիվ շտաբը տեղակայված է Եղեգնաձորում (ՀՀ Վայոց ձորի մարզ): Առաքելության նպատակը Հայաստանի սահմանամերձ շրջաններում իրավիճակի կայունացումն է, վստահությոն և մարդկանց անվտանգության ձևավորումը հակամարտությունից տուժած շրջաններում և ԵՄ աջակցությամբ Հայաստանի և Ադրբեջանի միջև հարաբերությունների կարգավորման համար նպաստավոր պայմանների ապահովումը։