Կանադան հանձնառու է աջակցել Լեռնային Ղարաբաղի հակամարտության խաղաղ քաղաքական լուծմանը և տարածաշրջանում կայունության ապահովմանը։ Այս մասին Twitter-ում գրել է Կանադայի ԱԳՆ ղեկավար Մելանի Ջոլին։
«Այդ պատճառով մենք մեծացրել ենք մեր ներկայացվածությունը տարածաշրջանում։ Տեղեկացնում ենք, որ Կանադան կմասնակցի ԵՄ առաքելությանը Հայաստանում»,- նշել է նախարարը։
Հայաստանի արտգործնախարար Արարատ Միրզոյանը կիսվել է Ջոլիի թվիթով՝ բարձր գնահատելով Կանադայի իշխանությունների այս որոշումը։
«Մենք անկեղծորեն բարձր ենք գնահատում Կանադայի ներդրումն ու ներկայությունը Հայաստանում` հանուն մեր տարածաշրջանում խաղաղության և կայունության, ինչպես նաև ժողովրդավարական սկզբունքներին հավատարմության ընդհանրության վրա հիմնված երկկողմ հարաբերությունների ամրապնդման համար»,- գրել է Միրզոյանը:
Ավելի վաղ հայտնի էր դարձել, որ Կանադան նյութական օգնություն կտրամադրի Հայաստանում Եվրոպական միության քաղաքացիական դիտորդական առաքելությանը (EUMA): Օգնության հասցեատերը կլինի Հայաստանի Հանրապետությունում ԵՄ պատվիրակությունը։
