Եվրամիության պետությունների և կառավարությունների ղեկավարները Բրյուսելում կայացած երկօրյա գագաթնաժողովում կայացրեցին քաղաքական որոշում՝ երկարաձգել Ռուսաստանի դեմ տնտեսական պատժամիջոցները, որոնց ժամկետը լրանում է հուլիսի վերջին, հաղորդում է ՏԱՍՍ-ը ՝ վկայակոչելով Եվրոպական խորհրդի անդամ երկրներից մեկի աղբյուրը։
«Այո, Ռուսաստանի վերաբերյալ քննարկման շրջանակներում, ինչպես միշտ, բարձրացվեց Մինսկի համաձայնագրերի կատարման հարցը [Ուկրաինայի արևելքում հակամարտության կարգավորման վերաբերյալ]: Բոլորը համաձայն էին, որ էական առաջընթաց չկա: Ընդհակառակը, վերջին ամիսներին մենք տեսել ենք տագնապալի իրադարձություններ Ուկրաինայի և Ռուսաստանի սահմանին: Այդ պատճառով ոչ ոք դեմ չի եղել պատժամիջոցների ևս 6 ամսով երկարաձգմանն», - ասել է աղբյուրը:
Դիվանագետի խոսքով, գագաթնաժողովից անմիջապես հետո կսկսվի պաշտոնական ընթացակարգ, որը կավարտվի առաջիկա շաբաթների ընթացքում` Եվրամիության պաշտոնական տեղեկագրում համապատասխան կանոնակարգերի հրապարակմամբ:
2014 թվականին Եվրամիությունը պատժամիջոցներ սահմանեց Ռուսաստանի Դաշնության նկատմամբ Ուկրաինայում տեղի ունեցած իրադարձությունների և Ղրիմի ՝ Ռուսաստանի հետ վերամիավորման պատճառով: Սահմանափակող միջոցառումները բազմիցս ընդլայնվել և երկարաձգվել են։ Կասեցվեցին ոչ վիզային ռեժիմի և նոր բազային համագործակցության համաձայնագրերի շուրջ բանակցությունները, մտցվեց Ռուսաստանի Դաշնության պաշտոնատար անձանց ԵՄ երկրներ մուտքի արգելք, նրանց ակտիվները սառեցվեցին: Ներդրվեցին նաև առևտրային, ֆինանսական և ռազմական բնույթի սահմանափակող միջոցառումներ: Ի պատասխան՝ Ռուսաստանը արգելեց ԵՄ երկրներից մի շարք պարենային ապրանքների ներմուծումը։