Բելառուսի նախագահ Ալեքսանդր Լուկաշենկոն հայտարարել է, որ հարկավոր չէ կշտամբել Բելառուսին Ադրբեջանին զենք վաճառելու համար։
Նա պարզաբանել է, որ “Պոլոնեզ” հրթիռային համալիրի փորձարկումներին Բելառուս է հրավիրել և՛ հայերին, և՛ ադրբեջանցիներին, և՛ ռուսներին։ Նրանք հնարավորություն են ունեցել համոզվելու, որ այն իրոք բարձր ճշգրտության զենք է։
“Ադրբեջանցիները խնդրում են՝ վաճառեք։ Իսկ մենք պետք է դրա դիմաց վերցրած վարկը վերադարձնենք։ Եվ այդ ժամանակ ես ասացի, որ կվաճառեմ ադրբեջանցիներին։ Եվ հայերին առաջարկեցի նմանատիպ համակարգ։ Հայերը հրաժարվեցին, պատճառաբանելով, որ իրենք ունեն ռուսական “Իսկանդեր”, որը ցուցադրել են շքերթին”,- ասել է Լուկաշենկոն։
Նրա խոսքերով, ադրբեջանցիների խնդրանքով համալիրը նախապատրաստվել է շքերթի համար։
“Հավանաբար դա էր իմ սխալը. ես ջանացի այդ համալիրը պատրաստել շքերթին: Բայց չէ՞ որ հայերին էլ էի առաջարկել, նրանք ասացին, որ հարկավոր չէ”,- ասել է Լուկաշենկոն։
Այդուհանդերձ, Բելառուսիայի նախագահը նշել է, որ լավ է վերաբերվում բոլոր երկրներին, այդ թվում Հայաստանին և հայերին: