Ֆրանսիայի նախագահ Էմանուել Մակրոնը դատապարտում է Դոնեցկի և Լուգանսկի Ժողովրդական Հանրապետությունների (ԴԺՀ և ԼԺՀ) անկախությունը ճանաչելու Ռուսաստանի որոշումը։ Այս մասին ասվում է Ելիսեյան պալատի հայտարարության մեջ, որը հետևել է Պաշտպանության և ազգային անվտանգության խորհրդի ավելի քան երեք ժամ տևած նեղ կազմով նիստին։
«Հանրապետության նախագահը դատապարտում է Ռուսաստանի Դաշնության նախագահի որոշումը՝ ճանաչելու Արևելյան Ուկրաինայի անջատողական շրջանները»,- ասվում է կոմյունիկեում։ «Մակրոնը կոչ է արել շտապ նիստ հրավիրել ՄԱԿ-ի Անվտանգության խորհրդի, ինչպես նաև կիրառել նպատակային եվրոպական պատժամիջոցներ»,- ասվում է հաղորդագրությունում։։
Ելիսեյան պալատը Ռուսաստանի որոշումը գնահատել է որպես «Ռուսաստանի միջազգային պարտավորությունների միակողմանի խախտում և Ուկրաինայի ինքնիշխանության դեմ ոտնձգություն»։
Փետրվարի 21-ին ՌԴ նախագահ Վլադիմիր Պուտինը հայտարարեց Դոնեցկի և Լուգանսկի ժողովրդական հանրապետությունների ինքնիշխանությունը ճանաչելու մասին։ Դրանց ղեկավարներ Դենիս Պուշիլինի և Լեոնիդ Պասեչնիկի հետ ստորագրվել են բարեկամության, համագործակցության և փոխօգնության պայմանագրեր։