Արևմուտքը պետք է լրացնի ռուսների ներկայությունը տարածաշրջանում, Հանրայինին տված հարցազրույցում ասել է ՆԱՏՕ-ի նախկին գլխավոր քարտուղար, «Ռասմուսեն Գլոբալ» միջազգային քաղաքական խորհրդատվական կազմակերպության հիմնադիր Անդերս Ֆոգ Ռասմուսենը։
«Ես այստեղ եմ, ոչ այն պատճառով, որ դեմ եմ Ռուսաստանին կամ աշխատում եմ այստեղ ռուսական ներկայության դեմ: Ես հասկանում եմ, որ ռուս խաղաղապահները դեր են խաղում Հայաստանում և որոշ չափով կարողացան կանխել Ադրբեջանի հետագա ագրեսիան»,- ասել է Ռասմուսենը:
Բայց միևնույն ժամանակ նա նշել է, որ խաղաղապահները չկարողացան կանխել Ադրբեջանի կողմից շրջափակումն ու անցյալ տարվա ագրեսիան Հայաստանի դեմ։
«Հետևաբար, կարծում եմ, որ պետք է լրացնենք ռուսների ներկայություն Արևմուտքի ներկայությամբ, նորից նշեմ ԵՄ առաքելությունը, որն ուղարկվել է Հայաստան. սա ակնհայտ առավելություն է: Դա միանշանակ ուղղված չէ Ռուսաստանի դեմ, բայց հնարավորություն է տալիս դիվերսիֆիկացնել Հայաստանի հարաբերությունները, ընդլայնել ընկերների ցանկը, օգնել խուսափել հումանիտար ճգնաժամից Լեռնային Ղարաբաղում, ինչպես նաև կանխել Ադրբեջանի կողմից ապագա ագրեսիան»,- ասել է Ռասմուսենը։
