«Տարին փակում ենք բավականին լավ տրամադրությամբ»․ այս խոսքերով վարչապետ Նիկոլ Փաշինյանը այսօր սկսեց Կառավարության նիստը։ Նա մեջբերեց ԱՎԾ վիճակագրությունը, որի համաձայն՝ նոյեմբեր ամսվա տնտեսական ակտիվության ցուցանիշը եղել է 10,1 տոկոս։
Վարչապետը նշեց,որ ապրանքների արտահանման աճ կա՝ 25,7 տոկոս, առևտրի շրջանառությունը աճել է 11,9 տոկոսով, ծառայությունները՝ 11,6 տոկոս, շինարարաւթյունը՝ 4,7 տոկոսով, արդյունաբերության աճը 9,3 տոկոս է, արտահանման աճն՝ 9 տոկոս:
«Սրանք բավականին լավ ցուցանիշներ են և արձանագրում են, որ այն գաղափարախոսությունը, որ դրել ենք տնտեսական զարգացման հիմքում, ռեալ աշխատում է», - ասաց նա:
Էկոնոմիկայի նախարար Տիգրան Խաչատրյանը հայտնեց, որ 11 ամիսների ընթացքում ունենք կոնյակի արտահանման աճ մոտ 27 տոկոսով և գինիների արտահանումը 50 տոկոսով է աճել՝ ընդհանուր արժեքով 24 միլիոն դոլար և մրգային գինիները՝ 75 տոկոսով են աճել:
Վարչապետը մրգային գինիների արտահանման ցուցանիշներին ուշադրություն հրավիրեց և նշեց, որ ամենաշատ աճն են ցույց տվել:
«Նոր խմիչքի, նոր բրենդի ձեւավորման պրոցես է տեղի ունենում,քանի որ մրգային գինիների արտահանման աճը 11 ամիսներին կազմել է 75 տոկոս:
«Գիտեք, որ մրգային գինիները այդքան էլ տարածված չեն, փաստորեն այս ցուցանիշները ցույց են տալիս, որ դրանք կարող են բավական լուրջ հետաքրքրություն առաջացնել աշխարհում եւ, ըստ էության, հայկական «նոու-հաուի» էլեմենտներ են կրում իրենց մեջ»,-ասաց վարչապետը:
Վարչապետը նշեց նաև,որ տնտեսական ակտիվության աճի ցուցանիշը հետաքրքիր վարքագիծ է դրսևորում, և դինամիկան կարևոր ,շեշտելով,որ
պետական բյուջեի հարկային հավաքագրումների առումով էական ցուցանիշներ կան:
Պետական եկամուտների նախագահ Դավիթ Անանյանը նշեց, որ պետական բյուջեի հարկային եկամուտների փաստացի կատարողականը՝ հանած բոլոր ավելացրած արժեքի հարկի վերադարձնելը, լինելու է տրիլիոն 461-ի շրջանակներում:
Արմինե Գևորգյան