Հայաստանի և Ռուսաստանի արտաքին գործերի նախարարներ Արարատ Միրզոյանը և Սերգեյ Լավրովը կքննարկեն Ադրբեջանի հետ սահմանին ԵՄ դիտորդական առաքելություն տեղակայելու հարցը, ասել է ուրբաթ փոխարտգործնախարար Պարույր Հովհաննիսյանը։
Եվրոպական ինտեգրման հարցերի մշտական խորհրդարանական հանձնաժողովի նիստում Հովհաննիսյանը, մասնավորապես, անդրադարձել է մարտի 20-ին Միրզոյանի Մոսկվա կատարելիք այցին։
«Ռուսաստանի դեպքում տեղյակ ենք, որ զգայուն վերաբերմունք կա ԵՄ առաքելության տեղակայման շուրջ։ Ուստի, այդ հարցը քննարկում ենք գործընկերների հետ»,- ասել է Հովհաննիսյանը՝ ներկայացնելով ԱԳՆ 2022 թվականի գործունեության հաշվետվությունը։
Միրզոյան-Լավրով հանդիպման մասին
Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտնել էր, որ մարտի 20-ին Մոսկվայում տեղի կունենա Ռուսաստանի և Հայաստանի արտգործնախարարների հանդիպումը։ Բանակցությունների օրակարգում տարածաշրջանային խնդիրներն են։ Մասնավորապես Լաչինի միջանցքում և ընդհանրապես Լեռնային Ղարաբաղում իրավիճակի կարգավորումը, ինչպես նաև Ռուսաստանի, Հայաստանի և Ադրբեջանի ղեկավարների միջև եռակողմ պայմանավորվածությունների իրականացումը։
ԵՄ առաքելության մասին
Հայաստանում ԵՄ քաղաքացիական առաքելությունը (EUMA) մեկնարկել է այս տարվա փետրվարի 20-ին Անվտանգության և պաշտպանության ընդհանուր քաղաքականության (CSDP) շրջանակներում և ունի երկամյա մանդատ։ EUMA-ի բացառապես քաղաքացիական անձնակազմի ընդհանուր թիվը մոտ 100 մարդ է, այդ թվում՝ շուրջ 50 անզեն դիտորդ։
ԵՄ առաքելության օպերատիվ շտաբը տեղակայված է Եղեգնաձորում (ՀՀ Վայոց ձորի մարզ): Առաքելության նպատակը Հայաստանի սահմանամերձ շրջաններում իրավիճակի կայունացումն է, վստահությոն և մարդկանց անվտանգության ձևավորումը հակամարտությունից տուժած շրջաններում և ԵՄ աջակցությամբ Հայաստանի և Ադրբեջանի միջև հարաբերությունների կարգավորման համար նպաստավոր պայմանների ապահովումը։