Ազգային ժողովում զինվորական ծառայության հետ կապված մի նախագծի քննարկման ժամանակ ԲՀԿ պատգամավոր Գևորգ Պետրոսյանն ուշադրությունը սևեռեց զինծառայողների դրամական բավարարումների վրա։
«Զինծառայողների նյութական ապահովության խնդիրը չպետք է անտեսվի։ Մենք այստեղ՝ այս տաք դահլիճում, մեր գործն ենք անում, բայց այնտեղ մարդիկ ցրտին սահման են պահում: Պետք է իրենց նյութական ապահովության մասին մտածենք։ Կարծում եմ, որ եթե ամենավերին մակարդակներով հնչում է, թե բյուջեում փող կա և ծախսելու տեղ չկա, ես հուշում եմ ձեզ ծախսելու տեղը. այդ բյուջեի գումարը ծառայեցրեք մեր անվտանգությունն ապահովող մարդկանց շահերը ապահովելու համար», - ասաց նա:
ՀՀ պաշտպանության նախարարի տեղակալ Մակար Ղամբարյանը, արձագանքելով կոչին, ասաց.
«Այդ ուղղությամբ մշտապես աշխատանք է իրականացվում, և 18 միլիարդ դրամով դրամական ապահովության բարձրացում է տեղի ունեցել։ Միջինը 10 տոկոսով բարձրացվել են աշխատավարձերը, բարդ իրավիճակներում ծառայողների համար լրացուցիչ հավելավճարներ են սահմանվել»:
Խորհրդարանում այսքանով սակայն բանակի թեման չավարտվեց։ Երկրորդ ընթերցմամբ և ամբողջությամբ ընդունեց Բանակի մարզական ակումբը վերականգնելու մասին օրենքի նախագիծը: Այն ընդունվեց միաձայն` 105 կողմ ձայնով:
Հիշեցնենք ավելի վաղ ԱԺ-ում նախագիծը ներկայացրած ՀՀ պաշտպանության նախարարի տեղակալ Գաբրիել Բալայանը նշել էր, որ այն բավական սպասված է:
«Ներկայացված նախագծով առաջարկվում է վերականգնել Բանակի մարզական ակումբը, և զինվորական ծառայության զորակոչել սպորտում հաջողության արժանացած մեր այն քաղաքացիներին, որոնք չեն ընկնում տարկետում տալու կարգի շրջանակի մեջ», - նշել էր փոխնախարարը։
Արմինե Գևորգյան