Անկախ Պետությունների Համագործակցության (ԱՊՀ) ղեկավարները դեկտեմբերի 26-27-ը կհավաքվեն Սանկտ Պետերբուրգում՝ Ամանորի ավանդական ոչ պաշտոնական գագաթնաժողովին։ Հանդիպումը տեղի կունենա ՌԴ նախագահ Վլադիմիր Պուտինի նախաձեռնությամբ, հայտնում է ՏԱՍՍ-ը՝ Կրեմլի մամուլի ծառայությանը հղումով։
Ոչ պաշտոնական գագաթնաժողովի մասնակիցները կքննարկեն ԱՊՀ-ում համագործակցության ընդլայնման հարցեր, կամփոփեն անցնող տարվա հիմնական արդյունքները և կարծիքներ կփոխանակեն գործնական համագործակցության առաջնահերթ ոլորտների շուրջ։
ՌԴ նախագահի խոսնակ Դմիտրի Պեսկովը, մեկնաբանելով Պուտինի և Հայաստանի վարչապետ Նիկոլ Փաշինյանի և Ադրբեջանի առաջնորդ Իլհամ Ալիևի եռակողմ հանդիպման հնարավորությունը, նշել է, որ միջոցառման շրջանակում նրանք «զրուցելու հնարավորություն կունենան»։
ԱՊՀ-ի նախորդ ոչ պաշտոնական գագաթնաժողովը նույնպես անցկացվել է Սանկտ Պետերբուրգում հոկտեմբերի 7-ին՝ Ռուսաստանի ղեկավարի ծննդյան օրը։ Դրանից հետո հոկտեմբերի 14-ին Աստանայում կայացել է նաև ԱՊՀ երկրների ղեկավարների խորհրդի նիստը։ Հանդիպման արդյունքում ընդունվել է փաստաթղթերի փաթեթ, այդ թվում, մասնավորապես, ահաբեկչության և ծայրահեղականության դեմ պայքարում համագործակցության ծրագիրը, կոռուպցիայի դեմ պայքարի համաձայնագիրը, ՀԱՊԿ-ում Համագործակցության դիտորդի կարգավիճակ ստանալու մասին որոշումները, ռուսաց լեզվի աջակցության և խթանման միջազգային կազմակերպության ստեղծումը։