Խորհրդարանում փակ գաղտնի քվեարկության արդյունքում Իշխան Սաղաթելյանն ազատվեց Ազգային ժողովի փոխնախագահի, իսկ Վահե Հակոբյանը՝ ԱԺ տնտեսական հարցերի մշտական հանձնաժողովի նախագահի պաշտոնից։ Այս որոշմանը «կողմ» քվեարկեց 66 խորհրդարանական, դեմ կամ ձեռնպահ ձայներ չեղան։
Իշխանական «Քաղաքացիական պայմանագիր» խմբակցության նախաձեռնությամբ ուրբաթ օրը հրավիրված արտահերթ ժողովին «Հայաստան» և «Պատիվ ունեմ» ընդդիմադիր խմբակցությունների պատգամավորները չեն մասնակցել։
Ազգային ժողովի երեք փոխխոսնակներից ընդդիմության միակ ներկայացուցիչը Սաղաթելյանը Վահե Հակոբյանի հետ «Հայաստան» խմբակցության անդամ է։
Նշենք, որ Սաղաթելյանի հետկանչով ընդդիմությունը չի կորցնում փոխվարչապետի քվոտան և կարող է նոր թեկնածու ներկայացնել։
Հունիսի 28-ին հայտնի դարձավ, որ «Քաղաքացիական պայմանագիր» խմբակցությունը սկսել է Սաղաթելյանին Ազգային ժողովի փոխնախագահի, իսկ Վահե Հակոբյանին ԱԺ տնտեսական հարցերի մշտական հանձնաժողովի նախագահի պաշտոնից հետ կանչելու գործընթացը։ Հիմնավորումը ԱԺ ընթացիկ նստաշրջանի նիստերի կեսից ավելիին ընդդիմադիր պատգամավորների բացակայությունն է։
Մայիսի 3-ից ընդդիմադիր «Հայաստան» և «Պատիվ ունեմ» խմբակցություններն ամբողջ կազմով բոյկոտել են խորհրդարանի նիստերը՝ կապված մայրաքաղաքում և մարզերում տեղի ունեցող հանրահավաքների և անհնազանդության ակցիաների հետ։ Նրանք պահանջում էին Փաշինյանի հրաժարականը վարչապետի պաշտոնից՝ պնդելով, որ Փաշինյանը հակապետական քաղաքականություն է վարում և չի կարող ապահովել Հայաստանի և Արցախի անվտանգությունը։