«Հույս ունեմ՝ վերջին անգամ ենք երկարացնում արտակարգ դրության ժամկետը, կառավարության արտահերթ նիստին ասաց վարչապետ Նիկոլ Փաշինյանը։
«Հիմա մենք ստիպված ենք ևս մեկ անգամ արտակարգ դրությունը երկարացնել։ Հուսով ենք՝ վերջին անգամ», - ասաց նա՝ ավելացնելով․«Այս անգամ արտակարգ դրության ռեժիմը կլինի ավեի մեղմ»։
Մեղմացումները ներկայացնելով` ՀՀ արդարադատության նախարար Ռուստամ Բադասյանը հայտնեց, որ վերացվում է օտարերկրյա քաղաքացիների մուտքի արգելքը։ 2-շաբաթյա ինքնամեկուսացման պահանջը վերջինների համար պահպանվելու է, բայց եթե այդ ընթացքում նրանք թեստ են հանձնում, ու բացասական պատասխան է ստացվում, ինքնամեկուսացման պահանջը վերացվում է։
«Վերացվում է ՀՀ տարածքում հանրահավաքնրի ու զանգվածային միջոցառումների արգելքը, որը փոխարինվում է թույլտվությամբ ու որոշակի կանոնների պահպանման կարգով, այն է` դիմակների պարտադիր կրումն ու սոցիալական հեռավորության պահպանումը»,– ասաց Բադասյանը։
Ընտանեկան միջոցառումների արգելքը ևս հանվում է, բայց մասնակիցների առավելագույն թիվ է սահմանվում` մինչև 40 անձ։
Նշենք, որ Կառավարության հաստատումից հետո որոշումն այսօր կքննարկվի նաև ՀՀ ԱԺ-ի՝ այդ նպատակով հրավիրվող հատուկ նիստում, ինչպես նախատեսված է օրենքով: Այս պահին նիստի ժամը դեռ հայտնի չէ:
Արմինե Գևորգյան