Հինգշաբթի օրը Հայաստանի Ազգային ժողովի պատգամավորները որոշում են կայացրել հանրաքվեի միջոցով քննարկել Սահմանադրության 213-րդ հոդվածում փոփոխություններ կատարելու հարցը, որով նախատեսվում է Սահմանադրական դատարանի լուծարումը:
Նախագծին կողմ է քվեարկել 88 պատգամավոր: “Լուսավոր Հայաստան” խմբակցությունը դեմ է քվեարկել նախագծին:
Քվեարկությունից առաջ “Բարգավաճ Հայաստան” խմբակցության պատգամավոր Միքայել Մելքումյանը տեղեկացրել է, որ իրենց քաղաքական ուժը չի մասնակցելու քվեարկությանը:
“Վերջերս հրապարակվել է Եվրախորհրդի խորհրդարանական վեհաժողովի մեզ բոլորիս ուղղված ուղերձը, որը կոչ է անում այս նախագիծն անհապաղ ուղարկել Վենետիկի հանձնաժողով՝ արագացված կարգով համապատասխան եզրակացությունը ստանալու համար”, - ասել է նա:
Մելքումյանը հիշեցրել է, որ իրենց խմբակցությունը պատրաստ է մնալ նիստերի դահլիճում այնքան ժամանակ, քանի դեռ համատեղ չի գտնվել այս իրավական ընթացակարգերի լուծումը:
Իր հերթին, խորհրդարանական մեծամասնությունը չի փոխել իր որոշումը:
“Եվս մեկ անգամ հաստատում եմ “Իմ քայլը” խմբակցության դիրքորոշումը, որ ինքնիշխանությունն ու ժողովրդավարությունը այլընտրանք չունեն Հայաստանում, և խմբակցությունը կքվեարկի հանրաքվեի նախագծի օգտին”, - ասել է խորհրդարանական մեծամասնության ղեկավար Լիլիթ Մակունցը:
Քվեարկությունը կայացել է այն բանից հետո, երբ ավելի վաղ Հայաստանի Ազգային ժողովի պատգամավորները չեն ընդունել այն օրինագիծը, որը խորհրդարանին թույլ կտար շրջանցել գործող ընթացակարգերը և լուծարել Սահմանադրական դատարանը:
Քվեարկությունից առաջ Հայաստանի վարչապետ Նիկոլ Փաշինյանը կոչ է արել ՍԴ դատավորներին հրաժարական տալ նախքան նախագահի կողմից տվյալ նախագծի ստորագրումը։
Եթե հանրաքվեի արդյունքներով բնակչությունը կողմ արտահայտվի սահմանադրական փոփոխությունների ընդունմանն, ապա ինը դատավորից յոթի լիազորությունները կդադարեցվեն: Այսպիսով, Սահմանադրական դատարանը դե ֆակտո կդադարի իր գործունեությունը, քանի որ չի ապահովվի կայուն մեծամասնությունը: