Հայաստանի խորհրդարանում կանցկացվի փակ քննարկում Սյունիքի մարզի Գորիս-Կապան ճանապարհին իրավիճակի վերաբերյալ: Այդ մասին լրագրողներին հայտնեց «Հայաստան» ընդդիմադիր խմբակցության քարտուղար Արծվիկ Մինասյանը:
«Այսօր խախտվում է Հայաստանի ինքնիշխանությունը: Մենք կորցրել ենք մեր ինքնիշխանությունն այս տարածքում, խախտվել է մեր տարածքային ամբողջականությունը: Այս հարցով պետք է քրեական գործ հարուցվի: Մենք ակնկալում ենք, որ գլխավոր դատախազը կպատասխանի այս բոլոր հարցերին», - ասաց նա:
Մինասյանը հայտնեց, որ փակ քննարկում է անցկացվելու, և Ազգային ժողովի ղեկավարությունը ջանքեր է գործադրելու քննարկումներին բարձրաստիճան պաշտոնյաների ներկայությունն ապահովելու ուղղությամբ։ Նա նշեց, որ Ազգային ժողովի ղեկավարության հետ քննարկումների ընթացքում ձեռք է բերվել նաև պայմանավորվածություն, որ այս նիստը պետք է անցկացվի սեղմ ժամկետներում`այսօր կամ վաղը:
«Եթե հանկարծ չհաջողվի (քննարկումներ անցկացնել - խմբ.), մենք օրենքով սահմանված կարգով կպահանջենք, որ դա անեն լիազորված հանձնաժողովները, քանի որ, օրենքի համաձայն, հանձնաժողովներն ունեն նաև պարտավորություններ և, ընդդիմության պահանջով պարտավոր են արտահերթ նիստ հրավիրել», - ասաց նա:
2021 թվականի սեպտեմբերի 9-ից Ադրբեջանի իշխանությունները Երևան-Կապան Մ 2 միջպետական ճանապարհի վրա Որոտան Գորիս գյուղի մոտակայքում հենակետ են տեղադրել: Այն սկսել է գործել սեպտեմբերի 11 -ից:
Օգոստոսի 26-ի առավոտյան ՀՀ ԱԱԾ-ն հայտարարեց, որ օգոստոսի 25-ին, ժամը 23: 00-ի սահմաններում, ադրբեջանական կողմը փակել է Սյունիքում Կապան-Գորիս միջպետական ճանապարհի Կարմրաքար-Շուռնուխ հատվածը: Ավելի ուշ Ադրբեջանի զինված ուժերը փակեցին Գորիսից Որոտան տանող ճանապարհի մեկ այլ հատված: