Պրահայում տեղի է ունեցել Հայաստանի վարչապետ Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը, հայտնում է ՀՀ կառավարության մամուլի ծառայությունը։
Հայ-թուրքական կարգավորման համատեքստում զրուցակիցները կարևորել են անմիջական շփումներն ու բարձր մակարդակի հանդիպումները։
Փաշինյանը և Էրդողանը քննարկել են հայ-թուրքական հարաբերությունների կարգավորման գործընթացը և այս ուղղությամբ հնարավոր հետագա քայլերը։
Ընդգծվել է երկու երկրների հատուկ ներկայացուցիչների քննարկումների արդյունքում ձեռք բերված պայմանավորվածությունների արագ իրականացման անհրաժեշտությունը։ Խոսքը, մասնավորապես, երրորդ երկրների քաղաքացիների համար ցամաքային սահմանի բացման, Հայաստանի և Թուրքիայի միջև ուղիղ օդային բեռնափոխադրումների իրականացման մասին է։
Մտքերի փոխանակում է տեղի ունեցել նաև տարածաշրջանային գործընթացների վերաբերյալ։