Հայաստանի վարչապետ Նիկոլ Փաշինյանը չորեքշաբթի օրը խորհրդարանում կառավարության հետ հարցուպատասխանի ժամին պատասխանեց Շուշիի մասին պատգամավորի հարցին:
Ընդդիմադիր «Հայաստան» խմբակցության պատգամավոր Լիլիթ Գալստյանը, Շուշիի մասին Փաշինյանի հայտարարության համատեքստում, թվարկեց միլիոնավոր դոլարների քաղաքաշինական մի շարք աշխատանքներ, որոնք իրականացվել են Շուշիում 90-ականներից ի վեր:
Լիտվա կատարած այցի ընթացքում վարչապետը Շուշի քաղաքի վերաբերյալ հանդես էր եկել հայտարարությամբ. «Շուշիի մասին, որ այդքան խոսում ենք, 30 տարվա ընթացքում Շուշիում քա՞նի բնակելի շենք է կառուցվել, ինչո՞ւ ոչ ոք հարց չի տալիս, թե ինչու չի կառուցվել, տրամաբանությունը ո՞րն է եղել, փող չեն ունեցե՞լ»:Այս հայտարարության վերաբերյալ հարցն արդեն հնչեցվել էր խորհրդարանի նիստում «Պատիվ ունեմ» խմբակցության պատգամավոր Տիգրան Աբրահամյանի կողմից:
Փաշինյանն, ի պատասխան պատգամավորի թվարկած ծրագրերի, ասաց, որ այս ամենը կազմում է Հաղթանակ զբոսայգու հարակից մի քանի տան արժեքը:
«Լավ, ներդրումներ են կատարվել Մոնումենտում (Երևանի թաղամաս Հաղթանակ զբոսայգու հարևանությամբ. խմբ.) չորս առանձնատան գնով, գերազանց է։ Հինգ, տաս տան, իսկ հետո՞», - ասաց նա:
Փաշինյանը հիշեցրեց, որ Արցախի կառավարությունը 2018 -ից հետո հայտարարել էր ներդրումային ծրագրերի մասին: Նա նաև նշեց, որ պատերազմից հետո կառավարությանը մեղադրեցին սադրիչ քայլի համար, որը հանգեցրեց պատերազմի՝ այն բանի համար, որ Արցախի նոր նախագահի երդմնակալությունն անցկացվել էր Շուշիում:
Իր հերթին, Գալստյանը ասաց, որ ոչինչ չունի պատասխանելու վարչապետի խոսքերին, քանի որ իր համար «հայրենիքը հայրենիքն է», իսկ նրա համար՝ «կադաստրային և շուկայական գինը», և այս դեպքում նրա հետ խոսելու ոչինչ չունի։
«Ինձ համար հայրենիքն այն վայրն է, որտեղ մարդիկ ապրում են, որը լքված տարածքի տպավորություն չի թողնում: Ես չեմ ուզում վերադառնալ և խոսել այն մասին, թե ինչ ներդրումային ծրագրերի մասին ենք մենք խոսել և հայտարարել, և ինչը գնահատվել է որպես սադրիչ գործողություն», - ասաց Փաշինյանը:
Վարչապետը նաև հարց բարձրացրեց, թե որտեղ էին ապրելու Լեռնային Ղարաբաղի ադրբեջանցիները, ովքեր, որպես Լեռնային Ղարաբաղի բնակիչներ, պետք է մասնակցեին հանրաքվեին, եթե նման բան տեղի ունենար:
«Շատ լքված գյուղեր կան, ուստի մենք այնտեղ տանող ճանապարհներ ենք կառուցում, կառուցում ենք մանկապարտեզներ, դպրոցներ, անց ենք կացնում լուսավորություն և ջրամատակարարում: Մենք այդպես ենք վարվում լքված գյուղերի հետ: Այդ պատճառով ավելի քան 1 միլիարդ դրամի ներդրում է կատարվել Սյունիքի լքված գյուղերում վերջին ամիսներին», - ասաց նա:
Վարչապետը շեշտեց, որ իրենց համար «հայրենիքը ոչ թե կենաց է, այլ մարդ, ծրագիր, որն իրականացվում է»:
«Եթե մեր կառավարությունում լինեին մարդիկ, ովքեր միլիոնատեր դարձան իրենց հայրենիքի հաշվին, այդ դեպքում կխոսեինք: Եվ ես չեմ կարծում, որ մարդիկ, ովքեր միլիոնատեր են դարձել իրենց հայրենիքի հաշվին, այսօր կարող են դասեր տալ հայրենիքի և հայրենասիրության մասին», - ասաց նա: