ՀՀ վարչապետ Նիկոլ Փաշինյանը երեքշաբթի աշխատանքային այցով մեկնել է Բրյուսել, հայտնում է կառավարության մամուլի ծառայությունը։
Օգոստոսի 31-ին Բրյուսելում նախատեսված են նրա հանդիպումները Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի հետ։
Երեքշաբթի օրը Միշելը հեռախոսազրույցներ է ունեցել Փաշինյանի և Ալիևի հետ։ Ըստ հայկական կողմի՝ Հայաստանի վարչապետը և Եվրոպական խորհրդի ղեկավարը կարևորել են երկխոսության շարունակությունը և Բրյուսելում բանակցությունների արդյունավետության հույս են հայտնել։
Ավելի վաղ, ի պատասխան Ադրբեջանի նախագահի օգնական Հիքմեթ Հաջիևի հայտարարության, թե Բրյուսելում կայանալիք եռակողմ հանդիպմանը նախատեսվում է համաձայնության գալ Հայաստանի և Ադրբեջանի միջև խաղաղության համաձայնագրի տեքստի պատրաստման համար աշխատանքային խումբ կազմակերպելու շուրջ՝ Հայաստանի վարչապետի աշխատակազմից նշել են, որ հանդիպման արդյունքներով համապատասխան հաղորդագրություն կտարածվի։