Հայաստանի վարչապետ Նիկոլ Փաշինյանն ասել է, որ կոռուպցիայի դեմ անհրաժեշտ է պայքարել պետական կառավարման և դատական համակարգում աշխատավարձերի բարձրացմամբ։
Պատասխանելով պատգամավորների հարցերին՝ վարչապետն ընդգծել է, որ կոռուպցիան կապում է առաջին հերթին պետական կառավարման, տեղական ինքնակառավարման, դատական և այլ համակարգերի հետ։
«Իմ դիրքորոշումը եղել և մնում է այն, որ անհրաժեշտ է էապես բարձրացնել աշխատավարձերը պետական կառավարման և դատաիրավական համակարգում: Սա ոչ պոպուլյար թեմա է, բայց չի կարելի պետական մարմիններից պահանջել որակյալ ծառայություններ, սպասել, որ գործերն արագ և արդյունավետ կգնան, և միևնույն ժամանակ, օրինակ, նախարարություններում ունենալ 90-100 հազար դրամ աշխատավարձով աշխատողներ»,- ասել է նա։
Փաշինյանը կարծում է, որ պետք է պայքարել «քրեական մտածողության» դեմ և անցնել օրենքի վրա հիմնված հարաբերությունների։
Ավելի վաղ խորհրդարանն ընդունել էր մի շարք օրենքների փոփոխություններ, որոնց համաձայն Հայաստանում ազգային անվտանգության մարմինների աշխատակիցների աշխատավարձերը ատեստավորումից հետո կբարձրացվեն, Հակակոռուպցիոն հանձնաժողովի աշխատակիցների աշխատավարձերը տարեկան կբարձրացվեն 2 տոկոսով։
Խորհրդարանը նաև առաջարկ է ստացել 92 տոկոսով բարձրացնել դատախազների աշխատավարձերը։ Ներկայումս հանրապետությունում կրտսեր և միջին դատախազների միջին աշխատավարձը կազմում է մոտավորապես 400-460 հազար դրամ մինչև հարկումը (մոտավորապես 295-350 հազար դրամ «մաքուր»)։