Հայաստանի վարչապետ Նիկոլ Փաշինյանը կարծում է, որ ռուսաստանյան խաղաղապահների առաքելությունը Լեռնային Ղարաբաղում այնքան էլ հեշտ առաքելություն չէ։ Այդ մասին նա հայտարարել է Վլադիվոստոկում կայացած Արևելյան տնտեսական համաժողովի շրջանակներում ՌԴ նախագահ Վլադիմիր Պուտինի հետ հանդիպմանը։
«Դուք նշեցիք, ես էլ եմ ցանկանում նշել ռուսաստանյան խաղաղապահների առաքելությունը Լեռնային Ղարաբաղում: Պետք է խոստովանել, որ դա այնքան էլ հեշտ առաքելություն չէ: Մենք բազմաթիվ անգամներ խոսել ենք դրա մասին»,- ասել է Փաշինյանը։
Հայաստանի վարչապետը բարձր է գնահատել ռուս խաղաղապահների գործունեությունը Լեռնային Ղարաբաղում, Լաչինի միջանցքում։ «Շատ կարևոր է սա ընդգծել։ Ընդհանրապես, Լեռնային Ղարաբաղում անվտանգության ապահովման իմաստով կան նրբություններ, որոնք մենք մշտապես քննարկում ենք և կարծում եմ` այսօր էլ շատ տեղին կլինի այդ հարցերը քննարկել»,- ասել է Փաշինյանը։
Պուտինի խոսքով՝ ամենազգայուն հարցերից մեկը Լեռնային Ղարաբաղի շուրջ անվտանգության ապահովման հետ կապված իրավիճակն է: «Մենք դրա շուրջ մշտապես Ձեզ հետ խոսում ենք, մշտապես կապի մեջ ենք»,- ասել է Պուտինը։