Հայաստանի վարչապետ Նիկոլ Փաշինյանը և իր թիմը խաղաղության դարաշրջան բացելու պատրվակով Հայաստանը տանում են դեպի պատերազմ՝ կանխատեսելի պարտությամբ, ասաց «Պատիվ ունեմ» խմբակցության նախագահ, «Հայրենիք» կուսակցության նախագահ Արթուր Վանեցյանը երկուշաբթի Ազատության հրապարակում կայացած մամուլի ասուլիսում։
Վանեցյանը հայտարարեց, որ եթե ընդդիմությունը հաղթի, պատերազմ չի լինի, բայց միեւնույն ժամանակ իրենք «թշնամիների առաջ վիզ չեն ծռի ու խաղաղություն չեն մուրա»։
«Հավատացե՛ք, շատ ճանապարհներ կան, և մենք գիտենք դրանք, ունենք փորձ, գիտելիք, հնարավորություններ պատերազմը կանխելու համար, մենք ամենաշատն ենք դեմ պատերազմին, ամենաքիչն ենք ցանկանում, որ այն սկսվի»,- ասաց նա:
Վանեցյանը կիրակի օրը Երևանի Ազատության հրապարակում անժամկետ ակցիա է սկսել՝ ընդդեմ Հայաստանում և Արցախում անվտանգության հարցերում իշխանությունների գործողությունների։ Նա ընդգծեց, որ իշխանությունների վերջին հայտարարությունները ցույց են տալիս, որ նրանք պատրաստ են Արցախն ամբողջությամբ տալ թշնամուն, «մենք Հայաստանի անվտանգության հետ կապված խնդիրներ ունենք»։
Ավելի վաղ ՀՀ վարչապետ Նիկոլ Փաշինյանը խորհրդարանում հայտարարել էր, որ միջազգային հանրությունը կոչ է անում Հայաստանին իջեցնել Լեռնային Ղարաբաղի կարգավիճակի հարցում նշաձողը, հակառակ դեպքում չի կարողանա օգնություն ցուցաբերել հայկական կողմին։ Այս հայտարարությունը լայն արձագանք առաջացրեց ինչպես Հայաստանում, այնպես էլ Արցախում։