Regnum- ը գրում է. Լեռնային Ղարաբաղում իրավիճակի կարգավորման բանակցություններին Թուրքիայի մասնակցությունը չի քննարկվել հոկտեմբերի 27-ին Ռուսաստանի նախագահ Վլադիմիր Պուտինի և նրա թուրք գործընկեր Թայիփ Էրդողանի հեռախոսազրույցի ընթացքում: Այս մասին հոկտեմբերի 28-ին հայտարարել է Ռուսաստանի առաջնորդի մամուլի քարտուղար Դմիտրի Պեսկովը:
«Դա չի եղել օրակարգում», - ասել է խոսնակը՝ պատասխանելով այն հարցին, թե արդյո՞ք երկու երկրների ղեկավարները քննարկել են ղարաբաղյան հիմնախնդրի շրջանակներում տարածաշրջանում իրավիճակի լուծման բանակցություններին թուրքական կողմի մասնակցությունը:
Ավելի վաղ Gisher.News-ը գրել էր Էրդողանի հայտարարությունը նախագահ Պուտինին ղարաբաղյան հիմնախնդրի կարգավորման գործընթացում համատեղ մասնակցելու առաջարկի մասին:
Պեսկովը նշել է նաև, որ նախօրեին արդեն բացատրել է Կրեմլի դիրքորոշումը բանակցություններին Թուրքիայի մասնակցության հավանականության վերաբերյալ՝ նշելով, որ այս հարցում ոչինչ չի փոփոխվել:
Բացի այդ, նա հավելել է, որ Լեռնային Ղարաբաղում մարտերը շարունակվում են, և դա առաջացնում է Ռուսաստանի իշխանությունների ափսոսանքը և անհանգստությունը: