Ժողովրդավարության քողի տակ Հայաստանի իշխանությունները գնում են դեպի միապետություն, Հայաստանի Հանրային հեռուստաընկերությանը տված հարցազրույցում ասել է ընդդիմադիր «Հայաստան» խմբակցության ղեկավար Սեյրան Օհանյանը։
Նա նշել է, որ ժողովրդավարության ամրապնդումը ազգային անվտանգության և ռազմավարության երաշխիքներից ու հիմքերից մեկն է։ Նրա խոսքով՝ ԱԺ-ն այսօր վերածվել է «զորամասի, որտեղ քեզ ստուգում են թե՛ մուտքի անցակետում, թե՛ աշխատասենյակից նիստերի դահլիճ գնալիս»։
«Տեսեք, թե ինչի վերածվել կառավարությունը, կառավարության շենքի շուրջ ոստիկանության զորքերը։ Ղեկավարությունը չի հասկանում, որ մեր երկիրը սկսվում է սահմաններից, այսօր մենք ավելի շատ ոստիկանության զորքեր ունենք, քան սահմանին կանգնած զինվորականներ»,- ասել է նա։
Օհանյանն անդրադարձել է նաև տեղական ինքնակառավարման մարմինների ընտրություններին` նշելով ոչ իշխող «Քաղաքացիական պայմանագիր» կուսակցությունից ընտրված ուժերի նկատմամբ հետապնդումները, բռնաճնշումները։ Նա նշել է, որ քրեական գործեր են հարուցվում այն անձանց նկատմամբ, ովքեր հաղթում են անգամ ազատության սահմանափակման դեպքում, օրինակ՝ Գորիսի քաղաքապետ Առուշ Առուշանյանի նկատմամբ։
«Այս ամենը հուշում է, որ ժողովրդավարության քողի տակ մենք գնում ենք դեպի միապետություն, իսկ Ազգային ժողովն այսօր կատարում է իշխանության հանձնարարականները»,- ասել է նա։