Իշխող «Քաղաքացիական պայմանագիր» խմբակցությունը Հայաստանի գլխավոր դատախազի պաշտոնում կառաջադրի Աննա Վարդապետյանի թեկնածությունը։ Այս մասին հայտնել է խմբակցության քարտուղար Հայկ Կոնջարյանը։
«Վարդապետյանն իր մասնագիտական որակներով, իր բարձր բարոյական և արժեքային հատկանիշներով համապատասխանում է առաջին հերթին օրենսդրությամբ սահմանված պահանջներին և այն կարևորագույն առաքելությանը, որը, իրենց կարծիքով, պետք է ունենա ապագա գլխավոր դատախազը»,- ասել է նա լրագրողներին խորհրդարանում։
Պատասխանելով հարցին, թե արդյոք կասկածի տակ չի դրվի Վարդապետյանի անաչառությունը, քանի որ նա, լինելով Հայաստանի վարչապետի օգնական, քաղաքական թիմի անդամ է, Կոնջորյանը նշել է, որ Վարդապետյանն անկուսակցական է։
«Վստահ եմ, որ տիկին Վարդապետյանն ընտրվելուց հետո կանի Հայաստանի Սահմանադրությամբ ու օրենքներով իրեն պատվիրակված իր գործը և կլինի մաքուր ու պատասխանատու իր խղճի, Սահմանադրության ու օրենսդրության առջև։ Սրանում ես առավել քան վստահ եմ»,- ընդգծել է նա։
Աննա Վարդապետյանը ծնվել է 1986 թվականին Երևանում։ ավարտել է Երևանի պետական համալսարանի իրավագիտության ֆակուլտետը։
Տարբեր տարիներ աշխատել է որպես Վճռաբեկ դատարանի նախագահի խորհրդական, դատարանների նախագահների խորհրդի քարտուղար, արդարադատության նախարարի խորհրդական։ 2020 թվականի մարտից նշանակվել է Հայաստանի վարչապետի օգնական։
Հայաստանի ներկայիս գլխավոր դատախազ Արթուր Դավթյանի լիազորությունների ժամկետը լրանում է 2022 թվականի սեպտեմբերին։ Նա այս պաշտոնում նշանակվել է 2016 թվականի սեպտեմբերին։