Ղրիմի կամրջի վրա տեղի ունեցած պայթյունից հետո Վերին Լարսի անցակետում (ռուս-վրացական սահմանին) հսկողությունը խստացվել է, ուրբաթ ճեպազրույցում ասաց Հայաստանի էկոնոմիկայի նախարար Վահան Քերոբյանը։
Նա ասաց, որ այսօր Երեւանում իր ռուս գործընկեր Միխայիլ Ռեշետնիկովի հետ հանդիպման ժամանակ քննարկել է սահմանի այս հատվածով անկաշկանդ տեղաշարժը հնարավորինս արագ վերականգնելու հարցը։
Նրա խոսքով, անցակետում խնդիր է հարուցում նաև եղանակը, այս համատեքստում նշելով լաստանավային և օդային հաղորդակցության անհրաժեշտությունը։
Հայաստանն ու Ռուսաստանը կապող միակ ցամաքային երթուղին անցնում է Վրաստանի Վերին Լարսի անցակետով։
Ավելի վաղ ՀՀ ԱԱԾ-ն հայտարարել էր, որ ուսումնասիրելով լրատվամիջոցների հրապարակումները, թե 2022 թվականի հոկտեմբերի 8-ին Ղրիմի կամրջի վրա տեղի ունեցած ահաբեկչության համար օգտագործված պայթուցիկները գաղտնի տեղափոխել են ՀՀ քաղաքացու վարած բեռնատարով՝ քրեական վարույթ է նախաձեռնել։ Նշված քաղաքացին, ըստ մամուլի հրապարակումների, Հայաստան է մուտք գործել արտերկրից, որից հետո մեկնել է Ռուսաստանի Դաշնություն։
ՀՀ ԱԱԾ-ում հետաքննությունը տարվում է միջազգային ահաբեկչությանն օժանդակելու, մի խումբ անձանց կողմից նախնական համաձայնությամբ ԵԱՏՄ սահմանով պայթուցիկ նյութերի մաքսանենգություն կատարելու և իրավունք վերապահող փաստաթղթեր կեղծելու առերևույթ դեպքերի կապակցությամբ։
ՀՀ պետական եկամուտների կոմիտեն (որը վերահսկում է մաքսային և հարկային ոլորտը) հայտարարել է, որ Ռուսաստանի ԱԴԾ վարկածով հոկտեմբերի 8-ին Ղրիմի կամրջի վրա պայթած բեռնատարի մաքսազերծման և այլ փաստաթղթերի ձևակերպման ընթացքում խախտումներ չեն եղել։ Գերատեսչությունը հրապարակել է այս բեռնատարի՝ Հայաստան մուտքի և հանրապետությունից ելքի երթուղու նկարները և նկարագրությունը։