Բավ է պառակտվել
05-12-2020 11:53

Կառավարությունը չի կարող գործել 2018թ. հանրային տրամադրությունների ոգով. ՀՀ նախագահ

ՀՀ նախագահ Արմեն Սարգսյանը հանդես է եկել կոչով, որում ասվում է՝ «Այսօր մեր երկիրը՝ որպես պետություն, և մեր հասարակությունը, բոլորս միասին գտնվում ենք հետպատերազմյան խոր ճգնաժամի մեջ: Սա պետք է արձանագրել առանց ձևականության, առանց ինքներս մեզ խաբելու և, միաժամանակ, առանց հուսահատության: Պետք է ամբողջությամբ գիտակցենք և ընդունենք այդ ճգնաժամի գոյությունն ու ամեն ինչ անենք այն հաղթահարելու համար:
Միասին, ձեռք ձեռքի տված:

Անկախ զբաղեցրած պաշտոնից, քաղաքական համոզմունքներից ու հայացքներից, անձնական համակրանքներից ու հակակրանքներից՝ մենք պետք է մտածենք մեր պետության, երկրի ու ժողովրդի ապագայի մասին:

Մեզնից յուրաքանչյուրն իրավունք ունի արտահայտելու իր կարծիքը, դժգոհությունը և իշխանություններից բացատրություն պահանջելու պատերազմի հետևանքով մեզ պատճառված ահռելի մարդկային և տարածքային կորուստների համար:
Կառավարությունը չի կարող գործել 2018թ. հանրային տրամադրությունների ոգով: Այսօրվա իրականությունը բոլորովին այլ է:

Այս լարված ու բարդ օրերին դիմում եմ բոլորիդ՝ ձեր յուրաքանչյուր գործողություն պետք է լինի օրենքին համապատասխան, պետք է լինի իրավաչափ:
Դիմում եմ նաև իրավապահ մարմինների ներկայացուցիչներին՝ կարգ ու կանոնի պահպանումը կարևոր է: Միաժամանակ հիշեք, որ ձեր առջև, Երևանի փողոցներում մեր հայրենակիցն է, մեզնից մեկը՝ կին թե տղամարդ, երիտասարդ թե տարեց: Նրանց մեջ են նաև մարդիկ, ովքեր մի քանի օր առաջ պաշտպանում էին հայրենիքը, մեզանից յուրաքանչյուրին, ձեզ:

Անթույլատրելի ու անընդունելի են ցանկացած բռնություն և ոչ համաչափ ուժի ու միջոցների կիրառումը: Ձեր գործողություններում պետք է դրսևորեք պատասխանատվություն, մարդկային և մասնագիտական բարձր հատկանիշներ:

Այսօր մենք կարիք ունենք շրջադարձային որոշումների: Լուծումները պետք է լինեն ազգային համաձայնության շրջանակում:

Մենք պետք է կարողանանք վերականգնել հանդուրժողականության, փոխադարձ հարգանքի մթնոլորտը, ի մի բերել մեր ժողովրդի բոլոր դրական ու կենսական որակները և դրանք վերածել հավաքական ուժի, որը կլինի մեր հետագա հաջողությունների գրավականը: Հանրապետության նախագահի և նախագահական ինստիտուտի գործունեությունն ուղղված է հենց այդ նպատակին:

Աստված պահապան բոլորիս»:

Հայաստանում սով պարզապես չի կարող լինել, դա հնարավոր չէ: Իշխանական պատգամավոր
Ալիևը չի կարող խուսափել հանցագործությունների պատասխանատվությունից, անգամ եթե պատերազմ սկսի․Արցախի նախագահ
«Արտակարգ դրությունը չի երկարաձգվի․ կգործեն այլ սահմանափակումներ».
"Միջազգային ահաբեկչության դեմ պայքարը չի կարող ընտրողական լինել". Արայիկ Հարությունյան
Google Map-ի կամ GPS-ի հիման վրա ՀՀ պետական սահմանների սահմանագծում իրականացվել չի կարող. Արման Թաթոյան