«Քաղաքացիական պայմանագիր» խմբակցությունը տապալեց Ադրբեջանի և Թուրքիայի կողմից վավերացրած «Շուշիի հռչակագրի» վերաբերյալ Հայաստանի խորհրդարանի հայտարարության նախագիծը։
Երկուշաբթի օրը ԱԺ արտաքին հարաբերությունների մշտական հանձնաժողովի նիստում «Հայաստան» ընդդիմադիր խմբակցության պատգամավոր Անդրանիկ Թևանյանը ներկայացրեց հայտարարության նախագիծ, որում նշվում է, որ հռչակագիրը պարունակում է կետեր, որոնք սպառնում են երկրի տարածքային ամբողջականությանը և անվտանգությանը։ Խոսքը, մասնավորապես, այսպես կոչված «Զանգեզուրի միջանցքի» մասին է (որն առաջ է տանում Ադրբեջանի նախագահ Իլհամ Ալիևը – խմբ.)։ Բացի այդ, հռչակագրում Լեռնային Ղարաբաղը դիտարկվում է որպես Ադրբեջանի մաս և հայտարարվում է Հայոց ցեղասպանության միջազգային ճանաչման դեմ պայքարի մասին։
«Քաղաքացիական պայմանագրի» դիրքորոշումը ներկայացրեց պատգամավոր Գուրգեն Արսենյանը, ով ավելի վաղ հայտարարել էր, որ այս քաղաքական ուժը իշխանության է եկել Թուրքիայի հետ հարաբերություններ հաստատելու համար։ Իշխող խմբակցության դիրքորոշումը հետևյալն է․ հռչակագիրը ստորագրելիս Հայաստանի ԱԳՆ-ն արդեն հայտնել է իր դիրքորոշումը, և խորհրդարանի անունից հայտարարության կարիք չկա։
Ի պատասխան՝ ընդդիմադիր պատգամավորները մեղադրեցին իշխանություններին թուրք-ադրբեջանական հռչակագրին և դրանում մատնանշված հակահայկական թեզերին աջակցելու, ինչպես նաև այն բոլոր նախապայմանների կատարման մեջ, որոնք Թուրքիան առաջադրում է Հայաստանին դիվանագիտական հարաբերություններ հաստատելու համար։
Պատասխանելով ընդդիմությանը՝ Արսենյանը հայտարարեց, որ իրենք (իշխանությունները) եկել են «խաղաղության դարաշրջան» հաստատելու համար, ժողովուրդն իրենց դրա համար մանդատ է տվել, և «մենք իրականացնում ենք այն քաղաքականությունը, որ իրականացնում ենք»։
Քվեարկության արդյունքում հայտարարության նախագիծը հանձնաժողովի կողմից չընդունվեց։
Շուշիի հռչակագիրը
Անցյալ տարվա հունիսի 15-ին Շուշիում Թուրքիայի և Ադրբեջանի նախագահների ստորագրած դաշնակցային հարաբերությունների մասին հռչակագիրը, մասնավորապես, նախատեսում է, որ «երրորդ երկրի կողմից ագրեսիայի դեպքում» երկու երկրները փոխադարձ օգնություն կտրամադրեն միմյանց։ Ադրբեջանի և Թուրքիայի խորհրդարանները վավերացրել են Շուշիի հռչակագիրը։
Ավելի վաղ Հայաստանի արտգործնախարարությունը դատապարտել էր Թուրքիայի և Ադրբեջանի նախագահների հունիսի 15-ին կայացած համատեղ այցը Արցախի Հանրապետության Շուշի քաղաք, այն որակելով տարածաշրջանային խաղաղության և անվտանգության դեմ ուղղված ակնհայտ սադրանք։
«Նույնքան դատապարտելի և սադրիչ են Շուշիում Թուրքիայի և Ադրբեջանի նախագահների կողմից ստորագրված հռչակագիրը և Թուրքիայի նախագահի կողմից Ադրբեջանի խորհրդարանում հնչեցված ելույթը։ Թեև թուրք-ադրբեջանական հռչակագիրն առանձին կետով նշում է, որ այդ փաստաթուղթն ուղղված չէ երրորդ կողմի դեմ, այնուհանդերձ, դրա ողջ բովանդակությունը թիրախավորում է հայ ժողովրդին։ Այն հստակ մատնանշում է Արցախի Հանրապետության դեմ 44-օրյա ագրեսիա իրականացրած երկու պետությունների դաշինքն ընդդեմ Արցախի ժողովրդի ինքնորոշման, Հայաստանի Հանրապետության տարածքային ամբողջականության և ցեղասպանություն վերապրած աշխարհասփյուռ հայ ժողովրդի իրավունքների»,- ասված է հայտարարության մեջ։