Երևանի ավագանու «Իմ քայլը» իշխող խմբակցությունը Երևանի քաղաքապետ Հայկ Մարությանին անվստահություն հայտնելու գործընթաց է սկսել։
«Նախնական տվյալներով 39 ստորագրություն արդեն կա։ Գործընթաց սկսելու համար 33 ստորագրություն է անհրաժեշտ»,- հայտնել է Ազատություն ռադիոկայանին ավագանու իշխող խմբակցության անդամ Արմեն Կոտոլյանը։
Միաժամանակ, նա չի հայտնել նշված գործընթացը սկսելու պատճառները, նշելով, որ խմբակցությունն ավելի ուշ կներկայացնի իր հիմնավորումները։
Ներկայումս Երևանի ավագանին բաղկացած է երեք խմբակցություններից՝ «Իմ քայլը» (54 անդամ), «Բարգավաճ Հայաստան» (5 անդամ), «Լույս» (3 անդամ)։
Վերջին զարգացումները քաղաքապետի շուրջ
2018 թվականին Մարությանը վարչապետ Նիկոլ Փաշինյանի անմիջական աջակցությամբ «Իմ քայլը» դաշինքից ընտրվել է Հայաստանի մայրաքաղաքի քաղաքապետ։ Փաշինյանի և Մարությանի հարաբերությունները ճաք տվեցին Արցախյան պատերազմից հետո, երբ քաղաքապետը հեռվացավ իրեն սատարող քաղաքական ուժից։ Մարությանի հնարավոր հրաժարականի և այս պաշտոնում նոր կամակատարներ առաջադրելու իշխանությունների մտադրության մասին լուրերը բազմիցս են շրջանառվել։
Դեկտեմբերի 12-ին «Հայկական ժամանակ» թերթի կայքում, որը խմբագիրը երկար տարիներ եղել է Հայաստանի ներկայիս վարչապետ Նիկոլ Փաշինյանը, իսկ այժմ այն գլխավորում է Փաշինյանի կինը՝ Աննա Հակոբյանը, հրապարակվել է «Հայկ Մարությանին «հեղափոխույթունից շեղած» գեներալներըը» հոդվածը։
Անստորագիր հոդվածում, մասնավորապես, ասվում է, որ, ըստ լուրերի, Արցախում 44-օրյա պատերազմից հետո Մարությանը դիմում է ներկայացրել իշխող «Քաղաքացիական պայմանագիր» կուսակցությունից հեռանալու մասին և խզել հարաբերությունները իշխող ուժի անդամների հետ։ Նշվում է, որ նա իր քավորի՝ գեներալ Արթուր Ալեքսանյանի (Ամարասի Արթուր) միջոցով սերտ հարաբերություններ է հաստատել մեկ այլ գեներալի՝ «Հայաստան» խմբակցության ղեկավար Սեյրան Օհանյանի հետ։ Տեղեկություններ են շրջանառվում նաև Հայաստանի նախկին նախագահ Ռոբերտ Քոչարյանի հետ Հայկ Մարությանի հանդիպման մասին։
Քաղաքապետարանի մամլո քարտուղար Հակոբ Կարապետյանը նախ հրաժարվել է մեկնաբանել «դեղին մամուլի բամբասանքները», սակայն ավելի ուշ հերքել է Քոչարյանի հետ հանդիպման մասին տեղեկությունները։
Բացի այդ, Հայաստանի մրցակցության պաշտպանության հանձնաժողովը նախօրեին վարույթ է հարուցել Երևանի քաղաքապետարանի դեմ։ Հանձնաժողովը պարզել է, որ Երևան քաղաքի ասֆալտբետոնյա ծածկի վերանորոգման աշխատանքների ձեռքբերման նպատակով 2017-2021 թթ. կազմակերպված գնման ընթացակարգերի շրջանակում Երևանի քաղաքապետարանի և մի շարք տնտեսավարող սուբյեկտների դրսևորած վարքագիծը կարող է պարունակել հակամրցակցային համաձայնության, տնտեսական գործունեության համակարգման, ինչպես նաև պետական մարմինների և դրանց պաշտոնատար անձանց հակամրցակցային գործողությունների կամ վարքագծի հատկանիշներ։