Իշխող «Քաղաքացիական պայմանագիր» խմբակցությունը Մարդու իրավունքների պաշտպանի պաշտոնում կառաջադրի Հայաստանի գլխավոր դատախազի տեղակալ Անահիտ Մանասյանի թեկնածությունը, ասել է խմբակցության ղեկավար Հայկ Կոնջորյանը։
«Համարում ենք, որ տիկին Մանասյանն իր մասնագիտական կարողություններով եւ արժեհամակարգով այն թեկնածուն է, որը կարող է լինել մարդու իրավունքների պաշտպան»,- մեջբերում է Կոնջորյանին tert.am-ը։
«Ազատության» տեղեկություններով՝ ընդդիմադիր խմբակցություններն այս պաշտոնի համար դեռ չունեն թեկնածու։ «Հայաստան» խմբակցության անդամ Արծվիկ Մինասյանը ռեսուրսին ասել է, որ իրենք որոշում չունեն, քննարկումները շարունակվում են։
Հայաստանի օմբուդսմեն Քրիստինե Գրիգորյանը հունվարի 23-ին օրենքով սահմանված կարգով Ազգային ժողով ներկայացրեց հրաժարականի դիմում՝ այլ աշխատանքի անցնելու կապակցությամբ։ ԱԺ փոխխոսնակ Հակոբ Արշակյանը հունվարի 24-ին ընդունեց նրա հրաժարականը։