Միջազգային իրավական հարցերով Հայաստանի ներկայացուցիչ Եղիշե Կիրակոսյանը ներկայացրել է Ադրբեջանի համար հնարավոր հետևանքները Լաչինի միջանցքի ապաշրջափակման վերաբերյալ Միջազգային դատարանի որոշումը չկատարելու դեպքում։
Արդարադատության միջազգային դատարանը չորեքշաբթի օրը բավարարել է Հայաստանի պահանջը և Ադրբեջանին պարտավորեցրել չխոչընդոտել Լաչինի միջանցքով երկու ուղղություններով ապրանքների, մարդկանց և տրանսպորտային միջոցների ազատ տեղաշարժին։
«Ադրբեջանի կողմից նման որոշումների չկատարումը կառաջացնի առնվազն իրենց երկրի հեղինակության հետ կապված խնդիրներ և լրացուցիչ բարդություններ»,- ասել է Կիրակոսյանը Հանրային հեռուստաընկերությանը տված հարցազրույցում։
Նա ընդգծել է, որ հայկական կողմը պետք է ամեն ինչ անի, որպեսզի միջազգային հանրությանը մշտապես հիշեցնի Բաքվի այս նոր հանձնառության մասին։ Միաժամանակ նա տեղեկացրել է, որ դատարանի որոշման մեջ հստակ ամրագրված ժամկետներ չկան, բայց այն ումն ուժի մեջ է մտնում անմիջապես։
«Դատարանի որոշումը առանցքային նշանակություն ունի: Սա վկայում է այն մասին, որ Հայաստանի պահանջները արդար են: Բացի եռակողմ հայտարարությամբ ստանձնած պարտավորություններից, Ադրբեջանը այժմ ունի ևս մեկ հստակ իրավական պարտավորություն, որն ամրագրված է դատարանի որոշմամբ՝ ապահովելու երկու ուղղությամբ Լաչինի միջանցքով անվտանգ տեղաշարժն»,- ասել է Կիրակոսյանը։
Նա ընդգծել է, որ այդ հանգամանքը հայկական կողմը պետք է քաղաքականապես օգտագործի բոլոր հնարավոր հարթակներում։