ՀՀ վարչապետ Կարեն Կարապետյանը պետական ամենագլխավոր տոնի՝ Հայաստանի Հանրապետության Անկախության օրվա կապակցությամբ շնորհավորական ուղերձ է հղել հայրենակիցներին:
«Անկախության 26 տարիները մեր երկրի և ժողովրդի համար լի են եղել փորձություններով, սակայն մեզ հաջողվել է ամրապնդել նորանկախ պետության հիմքերն ու առաջ շարժվել երկրի զարգացման ճանապարհով»,- ասված է կառավարության ղեկավարի շնորհավորական ուղերձում։
Կարապետյանի խոսքերով, զարգացման յուրաքանչյուր փուլ իր հետ բերում է նոր մարտահրավերներ, որոնց հաղթահարումն ավելի է ամրապնդում մեր պետությունը՝ այն դարձնելով ավելի գրավիչ ու մրցունակ։
«Այս նոր փուլի հրամայականն է ժամանակակից և առաջադեմ երկիր ստեղծելը, Ազատ, Անվտանգ, Արդար ու Խելացի Հայաստան ունենալը»,- ընդգծել է նա։
Վարչապետը վստահություն է հայտնել, որ այդ նպատակի իրագործման համար կան բոլոր անհրաժեշտ նախադրյալները՝ ամենակարևորը ստեղծարար հայ ժողովրդի ներուժն է:
«Վստահ եմ, որ միասնաբար ի զորու ենք կառուցել մեր երազած հայրենիքը։ Եվ ուզում եմ, որ և՛ Հայաստանի քաղաքացիները, և՛ աշխարհի տարբեր երկրներում բնակվող մեր հայրենակիցները վստահ լինեն, որ դա մեզ հաջողվելու է»,- նշել է Կարապետյանը:
Վարչապետը խաղաղություն, բարօրություն և առաջընթաց է մաղթել հայ ժողվրդին:
Այսօր Հայաստանը նշում է անկախության 26-րդ տարեդարձը: 1991թ. այս օրը հանրապետության Գերագույն խորհրդի որոշմամբ անցկացվեց ԽՍՀՄ-ի կազմից դուրս գալու և անկախ պետություն ստեղծելու վերաբերյալ հանրաքվե:
Համազգային քվեարկությունն անցավ ազգային շարժման ոգով: Անկախացմանը կողմ քվեարկեց գրեթե ողջ բնակչությունը՝ երկրի քվեարկության իրավունք ունեցող քաղաքացիների մոտ 99%-ը:
Անկախությունը երկրի խորհրդարանի կողմից պաշտոնապես հռչակվեց սեպտեմբերի 23-ին: