Ֆրանսիայի նախագահ Էմանուել Մակրոնը սպառնացել է ցրել Ֆրանսիայի Ազգային ժողովը (խորհրդարանի ստորին պալատը), եթե ձախողվի կենսաթոշակային բարեփոխումների նախագծի քվեարկությունը, որի պատճառով երկրում շարունակվում են բազմահազարանող ցույցերը, հայտնում է BFMTV-ն՝ վկայակոչելով աղբյուրին։
«Այս գիշեր Ելիսեյան պալատում տեղի ունեցած հանդիպումից հետո Մակրոնը սպառնացել է ցրել Ազգային ժողովը, եթե վաղը քվեարկությունը ձախողվի», - հաղորդել է հեռուստաալիքը, փոխանցում է ՌԲԿ-ն։
BFMTV-ն պարզաբանում է, որ մարտի 15-ի երեկոյան Մակրոնը հանդիպել է վարչապետ Էլիզաբեթ Բորնի և բարեփոխումների հետ առնչություն ունեցող մի շարք նախարարների հետ։
Օրինագծի ընդունման նախապատրաստական աշխատանքների ֆոնին Ֆրանսիայում չեն դադարում գործադուլներն ու բողոքի ցույցերը։ Երկրում դադարեցվել է տրանսպորտի ու նավթավերամշակման գործարանների աշծատանքը, փակվել են դպրոցները, իսկ փողոցներում ցուցարարների թիվը գերազանցել է 1 միլիոնը։ Ցուցարարների հիմնական պահանջը 60 տարեկանից թոշակի անցնելն է։
Բողոքի ֆոնին կառավարությունը համաձայնեց թոշակի անցնելու տարիքը 65-ի փոխարեն իջեցնել մինչև 64 տարեկան և խոստացավ 1200 եվրո նվազագույն կենսաթոշակ բոլորի համար:
Այնուամենայնիվ, արդեն մարտի 14-ին Ֆրանսիայի Սենատը (խորհրդարանի վերին պալատը) ընդունեց կենսաթոշակային բարեփոխումների մասին օրինագիծը։ Կողմ քվեարկեց 195, դեմ՝ 112 մարդ.«Հարյուրավոր ժամ տեւած քննարկումներից հետո Սենատն ընդունեց կենսաթոշակային բարեփոխումների տեքստը։ Վճռական քայլ դեպի բարեփոխումներ, որոնք ապահովում են մեր կենսաթոշակների ապագան։ Մենք լիովին պատրաստ ենք վերջնականապես ընդունել այն առաջիկա մի քանի օրվա ընթացքում», - քվեարկությունից հետո ասաց վարչապետ Էլիզաբեթ Բորնը:
Մարտի 16-ին Ֆրանսիայի Ազգային ժողովում կանցկացվի օրինագծի տեքստի քվեարկությունը։ Վերջնական փաստաթուղթը պետք է ընդունվի մինչև մարտի 26-ը, երբ լրանում է օրինագծերի քննարկման համար Ֆրանսիայում հատկացված 50-օրյա ժամկետը։
Վերջին անգամ կենսաթոշակային բարեփոխումն իրականացրել է Նիկոլա Սարկոզին 2010 թվականին, երբ կենսաթոշակային տարիքը 60-ից բարձրացվեց 62-ի։ Հետագայում Ֆրանսուա Օլանդը մասամբ չեղարկեց այն։