Բավ է պառակտվել
09-05-2022 20:09

Հայաստանի ժամանակավոր կառավարության գործողությունների ծրագիրը. Սաղաթելյանը խոսեց հիմնական քայլերի ու սկզբունքների մասին

ԱԺ փոխնախագահ, ընդդիմադիր «Դիմադրություն» շարժման անդամ Իշխան Սաղաթելյանը երկուշաբթի Ֆրանսիայի հրապարակում մեկնարկած հանրահավաքում ներկայացրեց մի շարք քայլեր և գործողություններ, որոնք պետք է հիմք հանդիսանան վարչապետ Նիկոլ Փաշինյանի գլխավորած գործող կառավարության հրաժարականից հետո ձևավորվելիք Ազգային համաձայնության ժամանակավոր կառավարության գործողությունների համար։

«Արցախը, Հայաստանի անկախությունը վտանգի տակ են ապաշնորհ ու ապազգային իշխանությունների պատճառով։ Սա պետք է ուղղել։ Ելքը հզոր Հայաստան ստեղծելն է՝ գործելով անվտանգություն-համերաշխություն-կայունություն-առաջընթաց շղթայով»,- ասաց նա։

Սաղաթելյանը նշեց, որ դրա համար գործող իշխանության հեռացումից հետո անհրաժեշտ է կառավարություն ձևավորել, որը Հայաստանի և Արցախի անվտանգության համակարգի արդիականացման միջոցով կապահովի ադրբեջանա-թուրքական տանդեմի կողմից արտաքին ագրեսիայի զսպումը։

«Այն պետք է հիմնված լինի նոր միջազգային դիվանագիտության վրա՝ ռազմավարական գործընկեր երկրների ներգրավմամբ, հայկական զինված ուժերի վերականգնմամբ։ Այդ կառավարությունը պետք է վերահաստատի Հայաստանի հանձնառությունը՝ լինելու Արցախի անվտանգության և ինքնորոշման իրավունքի երաշխավորը, բացառելով Արցախի ցանկացած կարգավիճակը Ադրբեջանի կազմում»,- ընդգծեց նա։

Ընդդիմության առաջնորդն ասաց, որ նոր իշխանությունը կբացառի Հայաստանի ինքնիշխանության և տարածքային ամբողջականության հաշվին միջանցքի տրամադրումը թշնամի երկրին՝ հաղորդակցությունների ապաշրջափակման քողի տակ, և չի իրականացնի սահմանազատում ու սահմանագծում Ադրբեջանի կողմից ուժի կիրառման ու դրա սպառնալիքի ներքո, իսկ Հայաստան-Թուրքիա հարաբերություններում կբացառի որևէ համաձայնություն, որը հարցականի տակ կդնի հայ ժողովրդի հայրենազրկման և ցեղասպանության իրողությունը, ինչպես նաև հայության հոգևոր մշակութային ժառանգության կրող լինելու իրավունքը։

«Մենք առաջնահերթություն ենք տալու պարենային անվտանգությանը և պետական ​​պաշարների ձևավորմանն»,- ասաց նա։

Սաղաթելյանի խոսքով, հատուկ ուշադրություն է դարձվելու հայ ռազմագերիների և պահվող անձանց վերադարձին, ինչը լինելու է հաջորդ կառավարության կարևորագույն խնդիրը։

Նա նշեց, որ նոր կառավարությունը պետք է կադրային քաղաքականություն վարի պրոֆեսիոնալիզմի և հստակ չափանիշների հիման վրա՝ ապահովելով կառավարման համակարգի ճգնաժամի հաղթահարումը։

«Պետության կառավարումից իսպառ բացառվելու են սուտը, պոպուլիզմը, կեղծիքը և անբանությունը։ Առաջնահերթ կարգով վերականգնվելու են գյուղատնտեսության և մշակույթի նախարարությունները, վերակառուցվելու է պետական իրավապահ համակարգը»,- ասաց նա։

Նա նաև հայտարարեց, որ տնտեսական աճը պետք է ուղղակիորեն ազդի մարդկանց կենսամակարդակի վրա՝ ապահովելով եկամուտների կայուն աճ, իսկ մարդկանց պարտքերի ու վարկային բեռը չպետք է զրկի նրանց արժանապատիվ կյանքի իրավունքից։

Նա նաև նշեց, որ նոր կառավարությունում չեն լինելու հանրության կողմից անընդունելի պաշտոնյաներ։

Սաղաթելյանը հայտարարեց նաև, որ նոր կառավարությունը Հայ առաքելական եկեղեցու և սփյուռքի ներգրավմամբ պետք է ձևավորի համահայկական հստակ օրակարգ ներքին և արտաքին մարտահրավերների հաղթահարման համար։

Նա թվարկեց այն քայլերը, որոնք անհրաժեշտ են ազգային համաձայնության նման ժամանակավոր կառավարություն ձևավորելու համար։

«Խոսքը հմուտ, բանիմաց, ազգային ուժերի մասին է։ Սա նշանակում է, որ բոլոր ակտիվ քաղաքական, ազգային ուժերը պետք է կազմավորեն հմուտ մարդկանց հատուկ ազգային թիմ, որը կստանձնի երկիրը ներկայիս վիճակից դուրս բերելու հավաքական պատասխանատվությունը։ Մենք արդեն հայտարարել ենք, որ այդ իշխանությունը չի լինելու մեկ անձի, քաղաքական ուժի կամ կուսակցության իշխանություն։ Դա կլինի լավագույն ազգային հավաքականը՝ բաղկացած հմուտ մարդկանցից»,- շեշտեց նա։

Այս առնչությամբ Սաղաթելյանն ասաց, որ գործող իշխանության հեռացումից հետո ընդդիմությունը կհրապարակի շուրջ 250 պրոֆեսիոնալ անձանց անուններ, որոնք ունեն համապատասխան գիտելիքներ, փորձառություն, հայրենասեր են, ունեն կամք, վճռականություն և պատրաստակամ են դուրս բերել երկիրն այս վիճակից։

«Այդ մարդիկ մեր մեջ են, 4 տարի պայքարում են այս ապազգային իշխանությունների դեմ։ Այս մարդկանցով, հայ ժողովրդի ներուժով մենք երկիրը դուրս ենք բերելու այս վիճակից»,- ասաց նա.

Բացի այդ, փոխնախագահի խոսքով, նոր կառավարությունում բացառվելու է վարչապետի միանձնյա որոշումների կայացումը կարևորագույն հարցերի վերաբերյալ։

Անվտանգության և պաշտպանության հարցերով ժամանակավոր կառավարության վարչապետը կարող է որոշումներ կայացնել միայն Անվտանգության խորհրդի հետ համաձայնեցնելով, կսահմանափակվեն վարչապետի գերլիազորությունները, կներդրվեն իսկապես խորհրդարանական կառավարման մեխանիզմներ»,- ասաց նա։

Սաղաթելյանը մատնանշեց նաև զինված ուժերի բարձրագույն հրամանատարական կազմի արագ ձևավորման, դիվանագիտական ​​կորպուսի հզորացման, քաղաքական նշանակումները նվազագույնի հասցնելու անհրաժեշտությունը։

«Ժամանակավոր կառավարությունն անհապաղ կձևավորի բանակցային պրոֆեսիոնալ խումբ, որը կբանակցի Ադրբեջանի, հարկ եղած դեպքում` նաև Թուրքիայի հետ ոչ թե վախի, պարտվողականության և թուրքամետ ուղղվածության դիրքերից, այլ բացառապես ազգային և պետական ​​շահերից ելնելով և երբեք չի շարժվի նշաձողն իջեցնելու ուղղությամբ»,- ասաց նա։

Սաղաթելյանն ասաց, որ երկրում արմատախիլ է արվելու վախի մթնոլորտը, մարդիկ չեն հետապնդվելու իրենց քաղաքական հայացքների համար։

«Հայաստանը կրկին գրավիչ կդառնա ներդրումների համար, իսկ Երևանը կդառնա համայն հայության սիրելի մայրաքաղաքը»,- ընդգծեց նա։

Նա հայտարարեց, որ ժամանակավոր կառավարությունը, որը 1-1,5 տարվա ընթացքում պետք է լուծի վերը նշված խնդիրները, դրանից հետո պետք է կազմակերպի ազատ, արդար և մրցակցային ընտրություններ, որոնցում երկրի քաղաքացիները քվեարկությամբ կձևավորեն երկարաժամկետ կառավարություն։

Հայաստանում անհնազանդության ակցիաների մասին

Ավելի քան երկու շաբաթ է, ինչ Հայաստանի ընդդիմադիր կուսակցություններն ու շարժումները բողոքի երթեր են կազմակերպում Երևանում, Հայաստանի քաղաքներում և գյուղական համայնքներում՝ կոչ անելով համախմբվել երկրի իշխանությունների գործողությունների դեմ։ Ընդդիմությունը կարծում է, որ իշխանությունների քաղաքականությունը սպառնում է Հայաստանի և Արցախի անվտանգությանը.

Մայիսի 1-ին Երևանում տեղի ունեցած բողոքի ցույցի ժամանակ ընդդիմությունը հայտարարեց անհնազանդության լայնածավալ խաղաղ գործողություններ սկսելու մասին։ Ընդդիմությունը վրաններ է տեղադրել մայրաքաղաքի կենտրոնում գտնվող Ֆրանսիայի հրապարակում և գիշերել դրսում։ Արդեն յոթերորդ օրն է, ինչ շարունակվում են անհնազանդության ակցիաները, հանրահավաքներն ու երթերը։

Ավելի վաղ ՀՀ վարչապետ Նիկոլ Փաշինյանը հայտարարել էր, որ միջազգային հանրությունը կոչ է անում Հայաստանին իջեցնել Լեռնային Ղարաբաղի կարգավիճակի հարցում նշաձողը, հակառակ դեպքում չի կարողանա օգնություն ցուցաբերել հայկական կողմին։ Այս հայտարարությունը լայն արձագանք առաջացրեց ինչպես Հայաստանում, այնպես էլ Արցախում։

Մոտակա 1-2 օրը Հայաստանի իշխանությունները կհայտարարեն արտահերթ ընտրությունների անցկացման ժամկետը – բնապահպանության նախարար
Կառավարության հրաժարականն անխուսափելի է․ Հայաստանի նախագահ
Կառավարությունն կօժանդակի ռեստորանային բիզնեսին աշխատատեղերի պահպանման գործում
Կառավարությունում քննարկել են Հայաստանի Ոստիկանության բարեփոխումների նախագիծը
Հայաստանի «Հրազդան -5» ՋԷԿ-ի աշխատանքը ժամանակավորապես դադարեցվել է