Հայաստանը ողջունում է ԵՄ ԱԳ նախարարների խորհրդի որոշումը՝ Հայաստանի հետ վիզաների ազատականացման շուրջ բանակցություններ սկսելու վերաբերյալ։ Այս մասին լրագրողներին ասաց Հայաստանի արտաքին գործերի փոխնախարար Պարույր Հովհաննիսյանը, մեկնաբանելով ԵՄ ԱԳ նախարարների խորհրդի վիզային ռեժիմի ազատականացման որոշումը։
Փոխնախարարը նշեց, որ վիզային ռեժիմի ազատականացման հարցը Հայաստան-ԵՄ օրակարգի ամենաբարդ հարցերից է։
«Եվրամիության արտգործնախարարների խորհրդի որոշումը խոսում է Հայաստանի հետ վիզային ռեժիմի ազատականացման շուրջ բանակցությունների մեկնարկի մասին։ Այսպիսով, գործընթացում առաջխաղացում կա։ Անհրաժեշտ է, որ ոչ մի երկիր չառարկի։ Նման կոնսենսուսի հասնելը դժվար է։ Սա շատ դրական զարգացում է։ Մենք կշարունակենք ակտիվորեն աշխատել Եվրամիության և նրա անդամ երկրների հետ՝ հնարավորինս արագացնելու այս գործընթացը»,- «Արմենպրես»-ի հաղորդմամբ՝ նշել է Հովհաննիսյանը:
ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը ԵՄ ԱԳ նախարարների խորհրդի նիստից հետո ասաց, որ քննարկվում են Հայաստանի համար վիզային ռեժիմի ազատականացման տարբերակները։
