Ռուսաստանի նախագահ Վլադիմիր Պուտինը ուրբաթ օրը հեռախոսազրույցում Հայաստանի վարչապետ Նիկոլ Փաշինյանի հետ շարունակել է Լեռնային Ղարաբաղի հարցի քննարկումը, հաղորդում է Կրեմլի մամլո ծառայությունը։
«Շարունակվել է մտքերի փոխանակությունը Լեռնային Ղարաբաղի տարածաշրջանում կայունության պահպանման հարցերի շուրջ: Վերահաստատվել է Հայաստանի, Ադրբեջանի և Ռուսաստանի ղեկավարների՝ 2020 թվականի նոյեմբերի 9-ին, հունվարի 11-ին և 2021 թվականի նոյեմբերի 26-ին ստորագրված եռակողմ պայմանավորվածությունների խստիվ պահպանման անհրաժեշտությունն»,- ասվում է հաղորդագրության մեջ։
Նախօրեին Փաշինյանը Պուտինի հետ հեռախոսազրույցում հայտարարել էր, որ Ղարաբաղում իրավիճակը ոչ միայն չի նորմալացել, այլ, ըստ որոշ տեղեկությունների, հնարավոր են նոր սադրանքներ ադրբեջանական ստորաբաժանումների կողմից Լեռնային Ղարաբաղում ռուսական խաղաղապահ զորախմբի պատասխանատվության գոտում։
Հայաստանի վարչապետը Ռուսաստանի Դաշնության նախագահին է ներկայացրել հայկական կողմի ակնկալիքն առ այն, որ ՌԴ խաղաղապահ զորախումբը միջոցներ կձեռնարկի ադրբեջանական ԶՈւ ներխուժած ստորաբաժանումները ՌԴ խաղաղապահ զորախմբի պատասխանատվության գոտուց դուրս բերելու համար:
