Հայաստանում այսպես կոչված ԵՄ քաղաքացիական առաքելություն տեղակայելու Բրյուսելի որոշումն ունի հստակ աշխարհաքաղաքական ֆոն, որը չի նպաստում Անդրկովկասում իրական կայունացմանը։
Ինչպես նշվում է ՌԴ ԱԳՆ կայքում, այս մասին հայտարարել է ՌԴ ԱԳՆ ղեկավարի տեղակալ Միխայիլ Գալուզինը Անդրկովկասում անվտանգության և կայունության հարցերով ժնևյան միջազգային քննարկումների համանախագահ, Հարավային Կովկասում ԵՄ հատուկ ներկայացուցիչ Տոյվո Կլաարի հետ հեռախոսազրույցում։
«Ընդգծվել է Բաքվի և Երևանի միջեւ այս նախաձեռնության շուրջ կոնսենսուսի բացակայությունն»,- ասվում է հաղորդագրության մեջ։
Եվրոպական միության խորհուրդը փետրվարի 20-ին հայտարարեց Հայաստանում ԵՄ քաղաքացիական առաքելության (EUMA) մեկնարկի մասին, որը երկամյա մանդատ ունի Անվտանգության և պաշտպանության ընդհանուր քաղաքականության (CSDP) շրջանակներում։
Ավելի վաղ, 2022 թվականի հոկտեմբերի 20-ից դեկտեմբերի 19-ը, Հայաստանում աշխատել է Եվրոպական միության դիտորդական առաքելությունը (EUMCAP): Այն բաղկացած էր 40 քաղաքացիական մասնագետներից, որոնք մշտադիտարկում էին իրականացրել Հայաստանի տարածքում՝ Ադրբեջանի հետ սահմանի մոտ՝ տարածաշրջանում տիրող իրավիճակի վերաբերյալ վերլուծության և զեկույցներ կազմելու նպատակով։